Publiká riba 03 Mei 2022
Na febrüari di aña 1942, Kòrsou i Aruba ta keda ataká pa supmarino aleman i nos islanan tambe a eksperensiá e guera ku a keda marká den nos historia. Na Oropa tambe nos tabatin diferente yunan di tera manera sr. Segundo J.A. (Boy) Ecury i sr. George J.L. Maduro ku a marka historia dor di lucha kontra e opresornan. Asina tambe tin vários hendenan mas ku a marka historia i a pèrdè nan bida durante di segunda Guera Mundial. Durante vários aña a pone atenshon na 129 persona ku a bira víktima. Pero despues di un investigashon di sr. Jos Rozenburg a bin sali na kla ku mas persona a pèrdè nan bida. Gobièrnu di Kòrsou e momentu ei a amplia e kantidat di persona ku a kai den guera na un total di 176 persona.
Un petishon ta bai na henter pueblo di Kòrsou pa huntu nos ban pone mas atenshon na nos historia ku énfasis riba libertat den aliansa den e konstelashon di Reino Hulandes ku nos tin komo pais outónomo. Un petishon na kada lider, maestro, dosente, hóben, studiante i pueblo di Kòrsou pa reflekshoná riba e fecha históriko akí. Ban hasi uso di informashon di e “ Caribisch Denk Boek voor 04 en 05 mei” i tambe wèpsait di Archivo Nashonal komo guia pa eduká nos nashon. Di e forma akií nos ke alsa patriotismo i nos edukashon kultural. Pa mas informashon di e fecha akí por bishitá:
Durante e seremonia solèm dia 4 mei 2022 akí, ta bai desvelá e plaka nobo ku ta nombra e 176 nòmber di e diferente víktimanan. Esaki ta keda pegá na muraya di e monumento di Guera na Waaigat. Un invitashon ta bai na pueblo di Kòrsou i famianan di víktimanan pa forma parti di e seremonia akí.
—
KOMUNIKASHON