Konmemorashon Lucha pa Libertat 17 ougùstùs 2020 - Informashon tokante Gobièrnu di Kòrsou Bo opinion

Notisia

Konmemorashon Lucha pa Libertat 17 ougùstùs 2020

Geplaatst op 18 August 2020 dor di Ministerio Enseñansa, Siensia, Kultura & Deporte

WILLEMSTAD – Gobièrnu di Kòrsou ta gradisí Asosashon Promoshon Konsenshi Istóriko (APKI) ku ta forma parti di Plataforma Sklabitut i Herensia di Sklabitut pa oganisá konmemorashon 225 aña Lucha pa Libertat ku e tema Kiko Awor: ‘Kita bo rudia for di nos Outonomia.’ Na okashon di e konmemorashon diferente kategoria di edat a para ketu riba e tema akí i a elaborá esaki for di kada un su perspektiva sea ku un diskurso òf poema. Kòrsou por a reflekshoná kon leu nos ta den nos proseso di outo-determinashon i tambe reflekshoná riba posibel akshonnan ku mester tuma pa nos komo pueblo sigui avansá.

Un akshon konkreto di parti di Gobièrnu pa konmemorá e fecha riba kua na 1795 Tula i su kompañeronan a inisiá den área di Kenepa e lucha inkansabel ku a kondusí na libertat, ta pa dektretá e Siklo Restourashon. Gobièrnu a tuma e desishon importante akí teniendo kuenta ku ta importante pa duna kontinuashon na alsa konsiensia riba e Lucha pa Libertat di Tula ku tabata karga e prinsipionan di e balornan igualdat, fraternidat i libertat i e proseso di emanispashon.

E Siklo di Restourashon tin komo meta pa nos restourá e konosementu di nos historia kreando programanan rondó di áreanan históriko na Kòrsou tantu pa nos pueblo komo pa turistanan. Tur aña tin shete (7) fecha ku por marka un siklo anual pa konmemorá nos historia di sklabitut. Esakinan ta: 25 di mart Dia Internashonal pa Rekordá Víktimanan di Sklabitut i Komersio Trans-Atlántiko di e pueblo sklavisá, 1 di yüli Dia di Emansipashon, 17 di ougùstùs Dia di Lucha pa Libertat, 23 di ougùstùs Dia Internashonal pa rekordá Komèrsio di Katibu i su Abolishon, 3 di òktober Fecha riba kua Tula a keda dekapitá na Kòrsou, 2 di desèmber Dia Internashonal pa Abolishon di Sklabitut i 10 desèmber Dia di Derechi Humano.

Gobièrnu ta tene kuenta na e fechanan di e Siklo di Restourashon pa kumpli ku e siguiente akshonnan:

‑ Stimulá i promové mas investigashon riba formanan ku por restourá nos historia di sklabitut i pone e konosementu akí na disposishon di pueblo;
‑ Inventarisá i identifiká sitionan di memoria kolektivo den tur área di Kòrsou pa por enfoká riba e historia di forma ku esaki ta sirbi pa nos komunidat por alsa su konosementu i konsiensia riba konsekuenshanan di sklabitut, e proseso di restourashon i fortifikashon sosial kultural di nos komunidat;
‑ Krea un plataforma, konsistiendo di ministerionan, fundashonnan, otro organisashonnan, antropólogo, historiadónan i artistanan kaminda ta stimulá i promové tur inisiativa ku ta enkaminá e proseso di restourashon di forma ku pueblo di Kòrsou por sa mas i kapitalisá riba nos historia riku pa nos desaroyo personal i kolektivo di nos pueblo;
‑ Sigui traha konvinsentemente riba e konsiensia i nifikashon di e balornan igualdat, fraternidat i libertat pa tur siudadano di Kòrsou den forma di materialnan informativo ku por uza den kuríkulo na skolnan, den tur bario di Kòrsou, riba medionan sosial i mas;
‑ Krea proyekto i aktividatnan ku ta enfatisá balor di nos historia i e aspekto di sobrebibensia salí for di e konsepto libertat i e responsabilidat ku esaki ta trese kuné;
‑ Uza fechanan di e siklo pa krea, inisiá, forma, konmemorá, restourá, dialogá, evaluá i midi desaroyo di nos pueblo miéntras ta alsa e balor di nos historia i herensia tantu tangibel komo intangibel di sklabitut.

E dekreto a keda presentá 17 di ougùstùs 2020 durante di e bunita seremonia di konmemorashon di 225 aña Lucha pa Libertat organisá pa APKI ku a tuma lugá na Parke Lucha pa Libertat dilanti di e monumento Desenkadená, den presensia di dignatario i pueblo di Kòrsou. Por tuma nota di e momentu históriko den e potrètnan athunto. Pa mas informashon di tur e akshonnan por mail nos na OWCS.Communicatie@gobiernu.cw.

Ministerio konserní