Bo opinion

Notisia

Konmemorashon na sr. Luis Henrique Placido Daal

Geplaatst op 06 October 2019 dor di Ministerio Enseñansa, Siensia, Kultura & Deporte

Willemstad – Djasabra 5 di òktober 2019 ta kumpli 100 aña ku e eskritor, poeta, periodista, hispanista i lingwista papiamentista kurasoleño Luis Henrique Daal (1919-1997) a nase na Kòrsou i Gobièrnu di Kòrsou ta fiha 5 òktober komo fecha pa keda konmemorá Luis Henrique Placido Daal.

Banda di e echo ku 5 oktober ta dia mundial dediká na maestronan di skol, Minister drs. Marilyn Alcalá-Wallé ta firma un dekreto ministerial pa pueblo di Kòrsou keda konmemorá Luis Henrique Placido Daal tur aña riba 5 di òktober, kuminsando for di 5 òktober 2019 riba e fecha ku e lo a kumpli 100 aña, pa motibu di su trabounan meritório ehersé riba tereno di arte literal. E dekreto a keda entregá di forma ofisial na subrino di Luis Daal ku ta sr. Rodney Daal. Na su turno sr. Rodney Daal a kompartí un buki di poesia di Luis Daal ku Minister titulá “Plenitut, un soño su spiritu” (1995). Minister ta gradisí sr. Rodney Daal pa e echo akí.

Gobièrnu a tuma nota tambe di e echo ku pa konmemorá e fecha grandi akí pa Luis Daal, diferente instansia i persona na Kòrsou, Aruba i Hulanda a organisá un total di 14 aktividat for di ougùstùs te desèmber 2019. E meta ta pa duna realse na i trese mas konosementu tokante un gran outor i poeta di Kòrsou, ku a pesar di esaki a keda relativamente deskonosí pa hopi. Kisas pasobra el a biba gran parti di su bida na Europa. Promé ku Luis Daal a emigrá pa Spaña na 1950, e tabata entre otro hefe di redakshon di e korant La Prensa na Kòrsou. Na Spaña Daal a studia periodismo, filosofia i spañó. Na 1962 el a bira lèktor na universidat di Madrid, kaminda el a duna Nederlandse Taal en Letteren i Historia kultural di Hulanda i Bélgika. Komo eskritor el a debutá na Spaña na 1951 ku e obra Viajar y escribir: Palabras íntimas. Despues el a publiká i hasi hopi mas, tambe den e área di periodismo na Spaña. Na 1968 Luis Daal a muda pa Den Haag, Hulanda, kaminda e tabata entre otro hefe di Departamento di Asuntunan Kultural di e Gabinete di Minister Plenipotensiario di Antia Hulandes (for di 1975). Luis Daal tabata kasá ku Rosemarie Daal-Blesch. For di e matrimonio akí a nase dos yu hòmber.

Daal a publiká vários obra poétiko na Papiamentu, esta Kosecha di Maloa (1963), Ku awa na wowo (1971), Sinfonia di Speransa (1975), Na ora oradu/Te juister stonde (un antologia di obra anterior, ku tradukshon na hulandes di Fred de Haas na 1976) i Plenitut, un soño su spiritu (1995). Tambe el a publiká diferente género mas manera biografia etc. El a skirbi 13 edishon di e radio-novela Lorna, mi yu ku mi, ku a pasa na Curom na 1961. Ademas e tabata un papiamentista pashoná. Igual na 1961 Daal a ofresé gobièrnu di Kòrsou un relato di e komishon ku el a enkabesá pa yega na un ortografia di Papiamentu: ‘Fo’i hopi un so’. Luis Daal tabata traduktor i intérprete na tres lenga. Banda di tur esaki e tabata kinólogo i miembro di hurado na kompetensia internashonal di kachó di rasa.

Dia 27 di sèptèmber 1995 Luis Daal a bin presentá su último tomo di poesia na Kòrsou. Huntu ku diferente otro artista mas a tene un presentashon festivo i masal di e obra akí den ouditorio di univer-sidat di Antia. For di grabashon di e evento akí lo pasa un parti den e programa di televishon Mi Tesoro djadumingu anochi 6 di òktober na TeleCuraçao. I djasabra 5 di òktober 13.00 or tramèrdia Z86 lo ripití e teatro radial Nos no mester lubidá, skirbí pa Luis Daal i transmití na Curom na 1960. Aki den por skucha bosnan di Luis Daal, Alfred Donker, Lucille Haseth, Elis Juliana, Pierre Lauffer, Jacques Penso i Rina Penso. Di esakinan ta Lucille Berry-Haseth i Rina Penso so ta na bida ainda. Asina tabatin i lo tin diferente programa ku entrevista mas, manera e programa Benta di Kas di Kultura dia 6 di òktober na Radio Hoyer 1 i Bon nochi, Kòrsou dia 7 di òktober na TeleCuraçao. I for di fin di òktober 2019 Biblioteka Nashonal Kòrsou Frank Martinus Arion, ku kolaborashon di Biblioteka Mongui Maduro, ta organisá un eksposishon tokante Luis Daal. E diferente kolaboradónan den e aktividatnan akí a pone tur 14 inisiativa huntu den un skema, ku lo publiká i distribuí via diferente medio. Tokante Luis Daal i su obranan, su gran konosedó dr. Henry Habibe a skirbi entre otro De spirituele opgang van een Curaçaose dichter (1997). 

Gobièrnu ta gradisí tur instansia ku a pone nan skouder bou di e konmemorashon importante akí pa pueblo di Kòrsou, Hulanda i eks Antias Hulandes i ta stimulá instansianan, skolnan i pueblo kompleto pa tur aña di nobo nos sigui konmemorá trabounan balioso di Luis Daal.

 **Riba e fotonan: Minister sra. Marilyn Alcalá-Wallé, sr. Rodney Daal, direktor di sektor Kultura i Deporte sra. Lizette Sambo-Velder, sra.Latifa Bakrimi, kolaborador i Minister Alcalá-Wallé.

**********************************************************************

Ministerio konserní