Publiká riba 15 Yüli 2026
WILLEMSTAD – Riba djárason 15 di yüli 2026, Konseho di Minister a risibí bishita di Miss Mini Universo 2026 Aaliyah Kenna ku a representá Kòrsou na e sertamen di Mini Universo 2026, ku a tuma lugá na Cartagena, Colombia.
Aaliyah a partisipá den e kategoria Little Mini Universo 2026, na unda el a resultá e ganadó apsoluto i tambe risibí e premio di ‘Most Photogenic’.
E logro akí no solamente ta koroná e trabou duru di Aaliyah i su tim di MBA Empowerment, pero tambe ta reflehá su abilidat pa na un edat asina hóben, konektá ku públiko, kamaranan i hurado na un nivel elevá ku e premio máksimo komo resultado.
Konseho di Minister ta sumamente orguyoso di e prestashon akí i ta felisitá Aaliyah Kenna, MBA Empowerment, su mayornan i tur ku a kontribuí na su éksito, ku alabes ta laga Kòrsou su nòmber resoná dignamente den eksterior.
Riba e potrètnan por mira Aaliyah Kenna, su mayornan i representante di MBA Empowerment huntu ku Promé Minister i demas miembronan di Konseho di Minister.
