Publiká riba 21 Mei 2026
Willemstad – Riba djárason 20 di mei 2026, Konseho di Minister a para ketu na e partida di Sra. Lizanne Dindial, èks Vise-Presidente di Konseho di Konsulta Kòrsou, durante un sena di despedida festivo. Ademas di e ministernan, su susesor resien nombrá, Sra. Ludmilla Vicento, tambe tabata presente na e sena.
Sra. Dindial a alkansá e periodo máksimo di diessinku aña komo miembro. El a drenta e konseho na 2011 i a keda nombrá komo Vise-Presidente na 2017. Promé ku esei, el a fungi komo Gezaghebber di Teritorio Insular di Kòrsou for di aña 2000 te ku 2010. Durante su karera, el a distinguí su mes pa medio di su ekspertisio, integridat i su gran kompromiso ku bon gobernashon.
Konseho di Minister a entreg’é un regalo komo muestra di apresio pa su añanan di dedikashon i aporte balioso na pais. E anochi tabata marká pa rèspèt, gratitut i rekuerdonan kaluroso di un karera atministrativo impreshonante. Sra. Dindial a risibi un gradisimentu kaluroso, huntu ku e mihó deseonan pa futuro.
