Konseho di Minister di Reino no a tuma desishon ainda tokante e di 3 transh di fiansa - Informashon tokante Gobièrnu di Kòrsou Bo opinion

Notisia

Konseho di Minister di Reino no a tuma desishon ainda tokante e di 3 transh di fiansa

Geplaatst op 10 July 2020 dor di Ministerio Asuntunan General i Promé Minister

WILLEMSTAD – Despues di e reunion di Konseho di Minister di Reino ku a tuma lugá djabièrnè 10 di yüli 2020, Promé Minister Rhuggenaath a informá ku no a yega na un desishon ainda tokante e di 3 transh di fiansa pa Kòrsou. Esei ta nifiká tambe ku no tin desishon, ni un akuerdo ainda riba e kondishonnan pisá mará na esaki. Un desishon definitivo ta keda posponé por lo pronto.

Di e forma aki Gobièrnu di Kòrsou ta haña tempu pa por fiha posishon i posibelmente presentá adaptashonnan òf alternativa na loke Hulanda a proponé. Esaki ta importante pa Kòrsou, ya ku pa por yega na un posishon ku tin e respaldo di komunidat, mester konsultá ku tur órganonan di konseho i tambe Parlamento di Kòrsou. Esaki simplemente no tabata algu realístiko den e korto tempu di 4 dia ku tabatin disponibel promé ku e reunion di Konseho di Minister di Reino di awe.

Kòrsou lo mustra e resultadonan di e trabounan ku a bin ta hasi pa kumpli ku e eksigenshanan den kuadro di e di 2 transh promé ku 15 di yüli, kual ta konfirmá e disponibilidat i nesesidat di Gobièrnu di Kòrsou pa bini ku reformanan i adaptashonnan riba término mas kòrtiku posibel den kuadro di e krísis ku COVID-19 a kousa. Por lo pronto no tin un temporada fiho stipulá pa yega na e posishon di Kòrsou, pero for di awor Gobièrnu lo kontinuá inmediatamente ku e siguiente pasonan nesesario pa sinta ku Parlamento, vários gremio i órganonan di konsulta.

Gobièrnu di Kòrsou ta pidi komunidat pa sintonisá e kanalnan ofisial di Gobièrnu i tambe tur media lokal awe 10:30’or di mainta, pa sigui un seshon virtual “live” ku Promé Minister Rhuggenaath.

Ministerio konserní