Konseho di Minister ta aprobá guia stratégiko pa desaroyo di eksportashon basá riba teknología - Informashon tokante Gobièrnu di Kòrsou Bo opinion

Notisia

Konseho di Minister ta aprobá guia stratégiko pa desaroyo di eksportashon basá riba teknología

Geplaatst op 24 April 2020 dor di Ministerio Desaroyo Ekonómiko

WILLEMSTAD- Djárason 22 di aprel último, Konseho di Minister a aprobá e promé paso pa yega na un strategia nashonal di eksportashon (National Export Strategy/NES) pa Kòrsou. Minister di Desaroyo Ekonómiko, Sra Giselle Mc William, a presentá e ‘Strategic Trade Development Roadmap’, (un guia stratégiko) pa desaroyo di un Strategia Nashonal di Eksportashon na Konseho di Minister i a risibí apoyo kompletu pa enkaminá e trayekto aki.

 Huntu ku un grupo amplio di ‘stakeholders’ i tambe bou di guia di ekspertonan internashonal di International Trade Center (ITC) a desaroyá e Strategic Trade Development Roadmap kaminda ta duna e vishon pa desaroyo di eksportashon pa Kòrsou,  e sektornan di prioridat ku Kòrsou tin ku enfoká riba dje i tambe kon e proseso di implementashon ta strukturá.

Konforme e guia stratégiko aki, e aspekto di teknologia i inovashon digital pero tambe e aspekto di servisio a keda stipulá komo esnan di mas krusial i di vital importansia pa sigui desaroyá i fortifiká ekonomia di Kòrsou. Ademas a deliniá ophetivonan stratégiko pa e strategia nashonal di eksportashon ku ta entre otro pa gradualmente krea mihó konekshonnan pa e merkadonan mas prinsipal pa Kòrsou via di adaptashon di manehonan ku ta trata komèrsio i invershon. Konsekuentemente tin ku fortifiká institutonan i krea formanan mas efektivo di kolaborashon pa asina mehorá nos klima di negoshi i tambe fasilitá ‘entrepreneurship’ i inovashon.

Pa logra e ophetivonan aki e plan maestro ta proponé seis sektor di prioridat ku tin potensial grandi pa kresementu ekonómiko pero tambe lo tin un balor agregá pa nos eksportashon i asina generá mas divisa. E seis sektornan aki ta:

  1.  Servisionan teknológiko/IT,
  2.  Servisionan den kuadro di edukashon.
  3.  Servisionan Marítimo i di Haf.
  4.  Servisionan Turístiko.
  5.  Industria Kreativo i
  6.  Servisionan Finansiero. Kombiná ku e seis sektornan aki lo traha riba plannan funshonal i integral pa sostené komèrsio manera e.o. fasilitashon di komèrsio, informashon di komèrsio (dato konfiabel i aktual), promoshon di komèrsio i invershon i fortifiká kompetensia pa empresarionan i stimulá entrepreneurship.

E konsepto di ‘E-Government’ ta un aspekto fundamental i ta sirbi komo komo liña kòrá den henter e strategia nashonal di eksportashon. Pa Gobièrnu esaki ta nifiká ku tin ku traha riba plataformanan digital/virtual ku lo yuda hasi negoshi i komèrsio mas efektivo i efisiente pa Kòrsou.

Pa hasi e implementashon mas efektivo i efisiente lo establesé tambe un Konseho Nashonal di Eksportashon. E Konseho aki tin representashon gubernamental pero tambe di sektor privá. Via di un Sekretariado Ehekutivo lo kordiná, monitoriá i evaluá e ehekushon di e plan nashonal di eksportashon. Huntu i den konsultá ku partnernan gubernamental i privá lo traha riba plannan funshonal pa e sektornan spesífiko ku lo sostené e proseso di implementashon.

Pa término kòrtiku e stapnan konkreto den kuadro di implementashon ta bira: establesé e Konseho Nashonal di   Eksportashon, fortifiká duana di Kòrsou, mehorá informashon i fasilitá provishonnan i servisionan pa empresanan nobo i mehorá e disponibilidat di estadístikanan di komèrsio.

Ku aprobashon di e guia stratégiko pa desaroyá eksportashon, Kòrsou a dal un stap grandi i sólido pa por yega na un ekonomia mas diversifiká i resistente. Dor di pone énfasis riba e aspekto di teknologia i inovashon den e plan maestro di eksportashon, Kòrsou ta hasiendo e stapnan nesesario pa sigui ku desaroyonan i trèntnan mundial konforme e asina yamá ‘normal nobo’.

E guia stratégiko pa desaroyá eksportashon ta yega na un momentu apropiá pa Kòrsou mirando e situashon di krísis ku nos pais i nos ekonomia ta konfrontando dor di e pandemia di COVID-19. Ta netamente na e momentu aki mester kuminsá traha riba e aspekto di diversifikashon di nos ekonomia di un manera mas efektivo i mas lihé posibel pa asina por hasi esaki mas resistente (ekonomia 2.0). P’esei mes e vishon di e strategia nashonal di eksportashon a keda determiná komo: Curaçao where business succeeds! (Kòrsou kaminda negoshi(nan) ta eksitoso!).

Ministerio konserní