Publiká riba 09 Mei 2025
WILLEMSTAD – Konseho di Minister a akordá pa e órgano bai ku un periodo di resès durante luna di yüli próksimo. Durante henter aña Konseho di Minister tin reunionnan fiho riba djárason i ora ta nesesario tambe reunionnan ekstraordinario. Durante reunion di Konseho di Minister, tur minister ta bini huntu pa informá otro i tuma desishon konhunto riba temanan i desishonnan importante di gobernashon i e aparato públiko (personal di gobièrnu), ku ta riba agènda di e siman.
Manera ta un kustumber den Reino, tantu Konseho di Minister komo parlamentonan ta tuma un temporada sin reuní durante di e temporada di ‘zomer’ i fakansi di skol, kual ta yama resès. E minister mes por skohe si e ta tuma un parti di e resès komo fakansi personal òf nò. Resès ta un periodo akordá kaminda no ta plania reunion di Konseho di Minister, pa asina brinda oportunidat, tempu i e espasio nesesario pa titularnan enfoká riba nan propio ministerio i e trabounan ku tin di atendé.
E temporada di resès no ta un temporada di vakashon, pero un mandatario por skohe i kordiná ku e por bai ku vakashon i su replasante lo represent’é durante di su ousensia. E temporada di resès ta kuminsá den yüli, kual ta nifiká ku e último reunion planiá lo ta riba djárason, 25 di yüni 2025. E promé reunion despues di resès lo ta riba djárason, 6 di ougùstùs 2025.
Ta bon pa nos enfatisá ku durante un resès, gobernashon di pais ta sigui normal. Den kasonan nesesario por tuma, konforme e prosudura, un desishon “op stuk”. Esaki ta nifiká ku e dokumentonan ku informashon nesesario i relevante ta pasa di kantor di un minister pa e otro, pa asina haña aprobashon di e mayoria.
Komo ku Konseho di Minister ta bai ku resès, ta importante pa komunidat i tambe e aparato públiko ta informá riba esaki. Den kaso di ámtenarnan, ta bon pa kada un empleado públiko ta na altura di e prosedura, promé pero tambe durante di un resès. Di e forma akí kada ministerio por prepará adelantá asina ku dokumentonan importante ku mester di desishon di Konseho di Minister, ta keda atendé na tempu.
Si bo ke sa mas informashon tokante Konseho di Minister i e desishonnan ku ta keda tumá durante reunionnan semanal, por bishitá www.gobiernu.cw i klek riba ‘Desishonnan Konseho di Minister’.
