Publiká riba 31 Mei 2021
WILLEMSTAD – Despues di un trayekto ekstensivo ku a inisiá for di 2019, e luna akí Sekretariado di Konseho di Minister a introdusí un plataforma digital pa e reunionnan semanal di Konseho di Minister pa medio di e aplikashon iBabs.
Huntu ku a partner lokal di iBabs, SIM Caribbean, Sekretariado a kompletamente digitalisá e método i prosesonan di trabou konserní pa loke ta e reunionnan semanal, kual ta enserá ku – banda di e posibilidat pa partisipashon na reunionnan di forma virtual – a mehorá e fasilitashon di informashon for di Sekretariado pa e miembronan di Konseho di Minister i ademas a optimalisá efisiensia di toma di desishon.
En adelanti, miembronan di Konseho di Minister ta risibí un notifikashon riba nan aparato di eskoho ku ta indiká ku e agènda i dokumentashon relevante pa e reunionnan ta di “upload” riba e aplikashon. Desishonnan di Konseho di Minister tambe lo ta direktamente inkorporá / prosesá den e aplikashon durante e reunion pa asina fortalesé transparensia i efektividat di deliberashon durante Konseho di Minister. Di e manera akí Konseho di Minister ta konkretisá su vishon di inovashon i modernisashon i a bira realmente un asina yamá eCabinet.
