Publiká riba 28 Ougùstùs 2026
Willemstad – Djárason, 26 di ougùstùs 2026, Konseho di Minister a risibí representantenan di e diferente sindikatonan. E motibu di e reunion tabata un karta entregá pa e sindikatonan, di kual a trata e kontenido personalmente ku Konseho di Minister.
E puntonan di agènda ta inkluí Konvenshon 151 di ILO i e paktonan di GOA di 2014. E Organisashon Internashonal di Trabou (ILO) ta un organisashon di Nashonnan Uní ku ta dediká su mes na defendé derechonan di trahadó i hustisia sosial.
A palabrá ku representantenan di ámbos partido lo desaroyá konhuntamente proposishonnan konkreto riba término hopi kòrtiku, ku lo atendé despues den e reunionan di CGOA (Centraal Georganiseerd Overleg in Ambtenarenzaken).
Konseho di Minister ta keda dispuesto pa fasilitá e proseso akí. Sinembargo tomo di desishon mester sosodé ku rèspèt pa e strukturanan eksistente i den e kuadronan di konsulta formal di CGOA. E kòmbersashon a kana den un ambiente ameno i ku rèspèt mutuo.
Tabata t’ei presente na e reunion representantenan di: Sindikato di Trahadornan den Enseñansa Kòrsou (SITEK), Sindikato Trahadornan di Aduana i Fiskalia (STrAF), Nationaal Algemene Politie Bond (NAPB), Sindikato Amtenarnan di Polis i Kadena Hudisial (SAP), i Algemene Bond van Overheidspersoneel (ABVO).
