Publiká riba 29 Aprel 2026
Willemstad – Durante di un kombersashon den Fort Amsterdam riba djamars, 28 di aprel, Konseho di Minister, presidí pa Promé Minister Gilmar Pisas, huntu ku minister Charles Cooper i minister Tyron Boekhoudt, a tuma despedida di sr. Thom de Graaf, ku for di 2018, tabata visepresidente di Raad van State. Promé Minister Pisas a ekspresá su apresio pa sr. de Graaf su karera largu den polítika i gobernashon i pa su kontribushon kontinuo na relashonnan den Reino. E mandatario a duna èkstra atenshon na e relashon semper habrí, konstruktivo i respetuoso ku sr. de Graaf tabatin ku e paisnan di Karibe den Reino.
Durante di e kombersashon a para ketu na e manera kon e visepresidente a kumpli ku su tarea den e último periodo, manera den e trayekto di konseho pa 70 ana Statüt i e posishonnan ku e diferente pais a tuma den esei. Minister Pisas a deseá sr. de Graaf tur éksito pa futuro i ta spera ku e ta keda un bon amigu di Kòrsou.
Thom de Graaf su remplasante ta sr. Sybrand Buma. Gobièrnu di Kòrsou ta para habrí pa un kontinuashon konstruktivo di e relashon eksistente.
