Konsepto base hurídiko pa salario di parlamentario i minister pa aprobashon den Parlamento - Informashon tokante Gobièrnu di Kòrsou Bo opinion

Notisia

Konsepto base hurídiko pa salario di parlamentario i minister pa aprobashon den Parlamento

Geplaatst op 04 March 2021 dor di Ministerio Asuntunan General i Promé Minister

WILLEMSTAD – Riba 12 di febrüari 2021, Konseho di Minister a tuma e desishon pa manda e konsepto di lei ku ta regla entrada di miembro i èks miembro di Parlamento di Kòrsou, i alabes entrada di minister i minister plenipotensiario, pa Parlamento aprobá. Gobernador di Kòrsou i e Ministernan di Asuntunan General, Finansas i Maneho di Gobernashon, Planifikashon i Servisio Públiko, a entregá e konsepto di lei na Parlamento riba 19 di febrüari último.

E konsepto di lei ta sirbi pa regulá entrada di miembro, èks miembro i penshonado di Parlamento di Kòrsou, respektivamente pa minister (plenipotensiario) i èks minister.Tambe ta inkluí regulashon di entrada pa nan famia i huerfano. E entrada akí ta trata (sobre)suèldo, penshon, penshon di huerfano, penshon di famia di e defuntu i pago transitorio (overbruggingsuitkering), na final di e término di miembresia di Parlamento òf retiro di e minister.

Si Parlamento aprobá e konsepto di lei, esaki ta krea un base legal – ku tabata ousente for di 10.10.10 – pa e pagonan den kuadro di miembresia di Parlamento i di minister. Propósito di e konsepto di lei akí ta pa implementá art. 52 i art. 37 di e Areglo di Estado di Kòrsou. E artíkulonan akí ta instruí legislado pa regla entrada asosiá ku e membresia di Parlamento i kargo di minister. E konseptonan di lei ta afiliá ku e areglo ku mester apliká i ku ta den práktika promé ku i desde 10.10.10. Loke ta partikular di e konsepto di lei di entrada pa miembronan di Parlamento akí ta, ku Areglo di Estado ta eksigí dos tersera voto di e miembronan di Parlamento, pa aprobashon.

Di akuerdo ku e palabrashonnan ku Hulanda riba e sosten di likides, e konseptonan di lei ta inkluí un provishon di retenshon di 25% riba e pakete di kondishonnan laboral di miembronan di Parlamento i ministernan. Hunta di Konseho a duna konseho riba 10 di desèmber 2020 riba esaki. Gobièrnu a inkorporá su reakshon riba opinion di Hunta di Konseho den e memoria splikativo ku ta akompañá e konsepto di lei. Si Parlamento aprobá e konseptonan di lei, e regulashonnan ta drenta na vigor riba e siguiente dia di publikashon di e lei. Esaki ku eksepshon di e rebaho di 25% ku ya a kuminsá retené for di 1 di yüli 2020 i ta sigui por lo pronto.

Por haña e konsepto di lei i sobrá dokumentonan di estado riba:
www.parlamento.cw/documenten/ontwerpen

Ministerio konserní