Publiká riba 15 Febrüari 2023
Willemstad – Durante temporada di Karnaval diferente suidadano ta tuma nan pèrmit di prekario pa traha stènt, stellage, òf pone tènt pa disfruta di e marchanan di Karnaval. Ministerio di VVRP ta bolbe hasi un apelashon serio na tur hende pa sòru pa nan konstruí konforme nan pèrmit i pa esaki sosodé na òrdu pa garantisá seguridat.
Tim di Kòntròl i Inspekshon di VVRP a kana henter e ruta di Karnaval i a hasi un kontròl visual di tur konstrukshon. Esaki a tuma lugá promé ku marcha hubenil. Tim di Kòntròl i Inspekshon di VVRP a tuma nota ku tin personanan ku ainda djis promé òf durante di marcha, ta trahando na nan stènt òf stellage. Un konstrukshon no na òrdu por trese peliger pa tur ku ta para sea den, riba, òf dilanti di e stènt, òf stellage.
Den kaso di un insidente, pa motibu ku a hasi adaptashon na e stellage, stènt, òf tènt, despues ku Tim di Kòntròl i Inspekshon a inspekshoná, esaki ta kai kompletamente bou di e reponsabilidat di esun ku ta doño di e pèrmit di prekario.
Ta importante pa informá ku na tur momentu e persona ku a traha e stènt òf stellage, a base di lei, ta responsabel pa e konstrukshon.
Manera menshoná kaba, Gobièrnu a sòru pa hasi e kontròl visual di stabilidat di e konstrukshon, i den diferente kaso a tuma informashon serka esnan ku a traha esaki, i kaminda a nota algu a laga un nota atras pa e doño di e pèrmit tuma kontakto ku ofisina di Prekario. Gobièrnu pues no ta karga ningun resposabilidat pa konsekuenshanan di fayonan di konstrukshon, sigur si tin modifikashonnan hasí despues di e kòntròl di e Tim enkuestion.
Pues un apelashon serio ta bai na un i tur pa konstruí na òrdu pa asina tur hende por disfrutá di un Karnaval seif i dushi.
Finalmente, Ministerio di VVRP ta deseá pueblo di Kòrsou un felis Karnaval 2023.
