Publiká riba 14 Yüni 2017
WILLEMSTAD — 13 yüni 2017 Promé Minister Rhuggenaath a yama bon bini na Kònsùl General Zhang na Fort Amsterdam pa un reunion pa diskutí e relashon entre Kòrsou i Repúblika di Pueblo di China (Volksrepubliek China). E reunion tabata positivo i nan a pone énfasis riba intensifikason di e relashon entre e dos pais.
Kònsùl General Zhang tabata tin remarke positivo tokante e relashon ku ta krese entre Kòrsou i Repúblika di Pueblo di China, e la enfatisá e historia largu di relashon ku Reino Hulandes. E aña aki Reino Hulandes i Repúblika di Pueblo di China ta selebrá 45 aña di relashon diplomátiko.
Promé Minister di Kòrsou a felisitá Kònsùl General Zhang pa e konferensia ‘One Belt, One Road’ resien di Repúblika di Pueblo di China den kual 29 hefe di estado i di gobièrnunan a bini huntu pa diskutí un kaminda pa desaroyo duradero, inovashon i interkambio di hende ku hende. En bista di esaki, Promé Minister i e Kònsùl General a diskutí e MOU i e “Heads of Agreement” ku Guangdong Zhenrong Energy Co. Ltd. resien; tur dos partido tabata den konsenso ku e akuerdo aki por resultá den un futuro ekonómiko i sosial prometedor pa tur dos pais.
Promé Minister Rhuggenaath a enfatisá e responsabilidat di Gobièrnu di Kòrsou pa salbaguardiá e futuro sosio-ekonómiko di Kòrsou i pa garantisá prosperidat pa tur siudadano. Kònsùl General Zhang a enfatisá e interes di gobièrnu di Repúblika di Pueblo di China pa kontinuá oumentá kolaborashon den vários aria, inkluyendo edukashon, pa kolaborá pa realisá metanan. Gobièrnu di Kòrsou ta anhelá kontinuidat den sigui traha riba eksperensianan positivo ku Repúblika di Pueblo di China, ekspanshon di relashon i mas konekshon entre e dos pueblo.
