Konsulta ku kompanianan grandi relashoná ku “Nos Medio Ambiente 2050” - Informashon tokante Gobièrnu di Kòrsou Bo opinion

Notisia

Konsulta ku kompanianan grandi relashoná ku “Nos Medio Ambiente 2050”

Geplaatst op 21 September 2020 dor di Ministerio Asuntunan General i Promé Minister

WILLEMSTAD – Djaweps 3 di sèptèmber último, a tuma lugá e di tres konsulta riba desaroyo di un lei básiko nobo relashoná ku medio ambiente. E proseso di konsulta aki, “Nos Medio Ambiente 2050”, a keda inisiá pa Ministerio di Salú, Medio Ambiente i Naturalesa. Den futuro e lei aki lo mester bira un Reglamentu Nashonal ku lo forma e fundeshi pa desaroyo di tur otro lei riba tereno di medio ambiente.

E promé seshon di konsulta riba desaroyo di e lei básiko aki, a tuma lugá riba 13 di ougùstùs. E ronda di konsulta aki tabata ku Young Generation ku ta un grupo di hóben (adulto) entre 18 pa 30 aña. Su siguiente siman,riba 27 di ougùstùs, a tene e di dos enkuentro entre Gobièrnu i entidatnan di supervishon. Pa e terser ronda di konsulta ku a tuma lugá dia 3 di sèptèmber último, a invitá kompanianan manera Refineria di Kòrsou (RdK), Aqualectra, Selikor, Curaçao Airport Partners (CAP), CurOil i Coca Cola. A presentá e konsepto di e lei básiko aki na e kompanianan i aktivamente kada un por a duna “input” na kontenido di e lei aki for di su propio kuadro di referensia.

A opta pa tene tur tres seshon di konsulta den edifisio di Departamento di Asuntunan Hurídiko na Fort Amsterdam mirando e ròl krusial ku e departamento aki tin den formulashon di e lei ambiental nobo aki. Lokual ta keda remarkabel na e trayekto di konsultanan aki, ta e meskla di profeshonalnan yòn eksterno i empleadonan públiko di diferente ministerio ku ta traha huntu pa hasi e proyekto aki un éksito. Minister di GMN señora Zita Jesus-Leito tabata presente na diferente di e enkuentronan aki i a suprayá e importansia di koperashon entre Gobièrnu i sektor empresarial pa realisashon di trayektonan manera esaki. Aki no ta trata di bèrdè òf sèn, e kos ta bèrdè i sèn, pues produsí entrada pero teniendo kuenta ku medio ambiente. Nos mester di tur dos pa adelanto i desaroyo di Kòrsou.

Na òktober di e aña akí lo tene konsulta ku diferente otro grupo di enfoke. Resultado di esaki lo keda añadí na formashon di e lei ambiental nobo aki, un lei básiko nobo pa Kòrsou.

Riba potrèt: Diskurso di Minister Jesus- Leito durante e seshon di konsulta di dia 3 di sèptèmber 2020.

 

 

Ministerio konserní