Notisia

Willemstad – Riba djaweps 24 di aprel 2024, Projectteam Toezicht en Handhaving (PTH) di Ministerio di Tráfiko, Transporte i Planifikashon Urbano (VVRP), den koperashon ku Kuerpo Polisial Kòrsou (KPC), a hasi un kòntròl parti mainta riba tur persona i vehíkulo ku ta operá den transporte públiko na altura di Megapir i rotònde Lucina Da Costa Gomez-Matheeuws.

Meta di esaki tabata pa kontrolá si e shofùrnan na e sitionan menshoná ta den posishon di tur pèrmit nesesario pa por operá den transporte públiko konforme ‘Landsverordening Personenvervoer’ i ‘Wegenverkeersverordening Curaçao 2000’ pa sea taksi òf operadó di ‘tour’, i a kontrolá pa taksinan klandestino. Tambe a kontrolá si e vehíkulonan ku ta keda usá pa transporte di turista tin nan papelnan na òrdu.

A kontrolá un total di 16 taksi, 2 vehíkulo di ‘tour’, 3 vehíkulo partikular. A repartí 9 prosèsverbal pa shofùrnan pa diferente tipo di infrakshonnan, manera entre otro falta pèrmit bálido, reibeweis, karchi di kùr, i seguro. Tambe a konstatá ku den un taksi e karchi di tarifa (‘wettelijke tariefkaart’) no tabata visibel. Durante di e kontrol, a tuma 2 vehíkulo ku no tabata kumpli ku un òf otro rekisito ‘in bewaring’.

PTH ta gradisí tur shofùr ku tabata tin nan papelnan na òrdu, tantu pa loke ta pèrmit komo di e vehíkulo. lo sigui ku mas di e tipo di kontrolnan aki pa asina garantisá un transporte públiko ordená, i evitá entre otro transporte públiko klandestino.