Kòrsou a risibí su kampionnan di Liganan Grandi - Informashon tokante Gobièrnu di Kòrsou

Notisia

Ministerio konserní Enseñansa, Siensia, Kultura & Deporte
 

Kòrsou a risibí su kampionnan di Liganan Grandi

Publiká riba 08 Desèmber 2021

Gobièrnu ta gradisí tur ku a duna aporte pa a risibí nos peloteronan kampion di Liganan Grandi

WILLEMSTAD –  Gabinete Pisas den su totalidat huntu ku representashon di Parlamento a risibí dos pelotero yu di Kòrsou ku a sabi di konkista e título máksimo di kampion ‘Mayor League Baseball World Series’. Konforme e maneho di Minister di Enseñansa, Siensia, Kultura i Deporte sr. Sithree van Heydoorn nos ta duna rekonosementu na nos mes hendenan i pa e motibu akí a risibí nos kampionnan di MLB sr. Kenley Jansen i sr. Ozhaino (Ozzie) Albies ku tur honor. Durante e enkuentronan akí ku a tuma lugá riba 5 i 6 di desèmber último, a duna e peloteronan un trofeo i plaka komo muestra di apresio pa na hazañanan den e mundu deportivo.

Dia 5 di desèmber 2021 a yega Kòrsou e kampion Mayor League Baseball World Series 2021 sr, Ozhaino (Ozzie) Albies i riba dia 6 di desèmber 2021 a yega e kampion ‘Mayor League World Series’ 2020 sr. Kenley (KJ74) Jansen.

Pa loke ta trata e yegada na Kòrsou di sr. Ozhaino Albies, Gobièrnu a risibí Ozzie ku un seremonia siguí pa un parada ku a terminá na e tereno kaminda tur kos a kuminsá, esta na vèlt di Chofi na Koraalspecht.

 Sr. Kenley Jansen a keda risibí segun su deseo ku un seremonia na aeropuerto den Jet Centre.

Gobièrnu di Kòrsou ta gradisí tur persona i instansia ku a duna nan aporte pa e aktividatnan ariba menshoná por a keda realisá. Ta trata di sra. Iva Coran (representante di famia Albies), sra. Judaris Albies (mama di Ozzie), sr. Manfred Gomez (representante di sr. Jansen), Ofisina di Turismo di Kòrsou (CTB), famia di Kenley Jansen, sra. Roxienne Albertina, Fundashon Desaroyo Deportivo Kòrsou, Aqualectra, Bureau Telecommunicatie & Post, Flow, Kantor di Number Tu y Yo, Jet Centre Curaçao, Sentro di Detenshon i Korekshon Kòrsou, sr. Lipo Elhage, dòkter Wallid Elhage, Korant Extra, Kortijn Ijs, restaurant Boka’s na Mambo Beach, Union Deportivo Koraalspecht, De Jongh Sporthuis, Saserdote Curtis Meris, Pastor Remy Juliet, sr. Kenneth Gijsbertha, sra. Jessica Damon i sr. Ceasar Rodriguez. Un danki na kada un di boso pa e aporte i esfuerso den e aktividatnan di e dos dianan akí.

Gabinete Pisas ta sigui kere den nos mes hendenan i duna rekonosementu na nan pasó kada aporte ta kontribuí na formashon i konstrukshon di pais Kòrsou.

 

**riba e potrètnan athunto por tuma nota di yegada di e dos kampionnan di MLB 2020/2021.

Pa mas potrèt por bishitá:  Yegada Ozhaino Albies

Pa mas potrèt por bishitá: Yegada Kenley Jansen