Publiká riba 21 Ougùstùs 2024
Willemstad – Resientemente, Colombia tabata anfitrion di un Kumbre Ministerial tokante Inteligensia Artifisia of AI manera e abreviashon ta konosí na Ingles. Esaki a tuma lugá na Cartagena, Colombia. Meta di e kumbre tabata pa yega na un aserkamentu riba e desaroyonan rondó di AI komo region di Latino Amerika i Karibe. Ministernan di 22 pais di Latino Amerika i Karibe i Alto Funshonarionan di Organisashonan regional a bin huntu pa diskutí tokante AI i su implikashonnan i oportunidatnan. Durante di e dos dianan tur e representantenan presente a haña espasio pa diskutí i interkambiá tokante e tema i tabatin ekspertonan ku a profundisá riba ekosistema pa AI, Edukashon i AI i e parti di Governance pa AI.
Kòrsou tabata bon representá na e kumbre. Minister di Desaroyo Ekonómiko, Ruisandro Cijntje a partisipá na e mesa rondó tokante ekosistema pa AI i a duna un bista kiko tur mester tin i kiko nos tin kaba na Kòrsou. Minister di Enseñansa, Siensia, Kultura i Deporte, Sithree van Heydoorn a partisipá na e mesa rondó tokante AI den enseñansa i a duna un bista kiko tur nos ta hasiendo i kwa ta e retonan ku nos ta enkontrando. Presidente di Parlamento tambe a partisipá mirando ku tin un kaminda di lei ku mester kana i tin un ròl importante pa Parlamento den esaki.
AI ta un realidat ku nos no por ignorá i e tei pa keda. Nos mester ta konsiente di dje, fasilitá i alabes protehá nos sosiedat di dje. Pesei mester fasilité dor di krea e ekosistema pa esaki por keda utilisá i te hasta kreá, sòru pa e ta integrá den nos enseñansa i strukturé den nos sosiedat a base di un strategia Nashonal, regulashon i supervishon pa semper e ta un instrumento konstruktivo i pa bon. Esei tabata esensia di e Kumbre Ministerial.
AI tabata instrumental den e toeslagenaffaire. Professor Hulandes (eks miembro di tweede kamer) na universidat Javeriana, Colombia Esther van Egerschot-Montoya Martinez a trese dilanti kon AI por bai hopi robes, refiriendo na e eskandalo ku a tuma lugá na Hulanda ku a bin na klá na 2021 kaminda AI tabata entre otro responsabel pa identifiká 25.000 hende komo hendenan ku tabata hasi froude ku kindertoeslag, i ku a labelnan komo estafador i pone nan paga bèk di un forma brutal, ku te hasta kondusí na huida, suisidio, famianan kibrà i ku a kosta e gabinete Rutte III pa disolve. “AI bias por sosodé den diferente otro proseso más, por ehempel awendia den hopi solisitut di trabou ta AI ta evalúa e solisitut ku tur e konsekuensianan ku esaki por bin kuné. Mas motibu pa wak AI holístikamente”, eksperto den telekomunikashon i regulashon Shernon Osepa ta trese dikanti. “I semper mester keda e ser humano ku mester agregá e toke emoshonal, ya ku AI ta sin emoshon.”
Minister Cijntje aparte di a partisipá na e aktividatnan menshoná, a hiba tambe un kombersashon ku Sr. Tomas Lamanauskas, ku ta e Sekretario General Athunto di International Telecommunications Union (ITU). Sr. Lamamauskas a enfatisá ku apesar ku Kòrsou no ta miembro direkto di ITU, e lo mantené e minister informá di desaroyonan global di AI kaminda e sektor ekonomiko por benefisiá di dje. Tambe Minister Cijntje a partisipá huntu ku tur otro ministernan presente na un seshon di Union Oropeo, kaminda nan a enfatisá e formanan ku e union por kontribuí na desaroyo di AI, atraves di otorgamentu di fondonan.
Kòrsou komo isla chikí mester uni ku otro paisnan pa nos keda na vanguardia di e desaroyonan. “Nos mester hasi e topiko aki diskutibel i nos mester fiha un posishon komo pais riba e desaroyonan di AI. Pesei pa medio di e plataforma publiko – privá Smart Nation Platform Curaçao nos lo bai kana un trayekto inklusivo i konkreto, desaroyá maneho i strategianan nashonal i implementá esakinan”, Minister Cijntje a indiká na e Kumbre.
Na final di e kumbre tur pais partisipante a adoptá a Deklarashon Ministerial tokante AI. E sigiente enkuentro di Latino Amerika i Karibe lo ta na Uruguay na November 2024.
