Notisia

Willemstad – Pa promé biaha den historia, Kòrsou lo partisipá na e torneo di futbòl mas grandi di mundu: Kopa Mundial di FIFA 2026 ku lo tuma lugá di 11 di yüni te ku 19 di yüli na Merka, Canada i Mexico. Komo ku e evento aki ta unu hístoriko pa nos isla, miles di fanátiko lo biaha pa sostené nos selekshon nashonal durante di e diferente partidonan na diferente siudat anfitrion. Eventonanan di e magnitut aki ta eksigí otro tipo di preparashon ku djis un biahe di plaser.

P’e motibu aki Ministerio di Asuntunan General i Direktorado di Relashonnan Eksterior ta kompartí algun informashon importante i konsehonan práktiko pa tur fanátiko ku ta biaha pa Kopa Mundial por prepará i disfrutá di e momentu inolvidabel aki sin preokupá.

Prepará dokumentonan nesesario i pèrmit di entrada
Banda di bo pasashi, kontrolá promé ku bo biaha di Kòrsou pa Merka, si tur bo dokumentonan pa por drenta Merka ta na òrdu:   

• Sòru pa bo pasport ta bálido pa un mínimo di 6 luna. 
• Bo ESTA (Electronic System for Travel Authorization) ta aprobá promé ku biaha.
  Tene kuenta ku: un ESTA no ta un visa, pero si e ta obligatorio pa tur biahero ku ta drenta Merka pa turismo òf estadia kòrtiku. 
• Ta rekomendabel pa hasi e aplikashon aki adelantá, promé ku fecha di biahe. 

Den kaso ku bo ta biaha ku menor di edat, tene kuenta ku mester di outorisashon previo di kabes di skol si e menor ta bai falta dianan di skol pa asistí na Mundial. Kòrda alabes pa yena bo formulario di outorisashon pa biaha ku menor di edat si esaki ta nesesario i konsultá e rekisitonan pa Merka ora ta biaha ku menornan di 17 aña. 

Si bo ta bai biaha for di Merka pa sea Canada òf Mexico, ta konsehabel pa konsultá e rekisitonan di entrada di kada pais.

Sera un seguro di biahe 
Ta konsehabel pa sera un seguro di biahe ku ta kubri e durashon di bo biahe kompleto. Perkurá pa bo seguro di biahe ta inkluí tratamentu médiko agudo, hospitalisashon, eventual evakuashon médiko i ta inklui repatriashon den kaso di fayesimentu. Si akaso bo tin un “worldwide travel insurance”, sigurá bo mes ku esaki ta inkluí tur e destinashonan ku bo tin intenshon di bishitá durante bo biahe. Tene kuenta ku tratamentu médiko na Merka, Canada i Mexico no ta grátis, i gastunan médiko por ta haltu.

Keda na altura di e último informashonnan spesífikamente pa mundial.

• Registrá pa risibí informashon aktualisá via ‘e-mail’ riba konseho di biahe pa Merka, Canada i Mexico: https://www.nederlandwereldwijd.nl/informatieservice-buitenlandse-zaken i ‘download’ e Reisapp di Buitenlandse Zaken.  
• ‘Download’ e aplikashon ofisial di ‘FIFA World Cup 2026’ (pa iOS i Android) 
• Bishitá ‘website’ ofisial di Kopa Mundial 2026 regularmente pa keda informá tokante eventual kambionan òf informashon importante ku por tin influensia riba bo biahe, estadia i planifikashon na Merka, Canada òf Mexico.
• Bishitá ‘website’ di Mundial FIFA 2026 di Kònsùl General di Merka na Kòrsou regularmente pa keda na altura di e último informashon i aktualisashon di biahe spesifikamente relatá na Mundial 2026: https://cw.usconsulate.gov/fifa-world-cup-26 
• Informashon aktualisá tokante kondishonnan di entrada i seguridat na Merka, ta disponibel den e konseho di biahe pa Merka: https://www.nederlandwereldwijd.nl/reisadvies/verenigde-staten-van-amerika 
• Informashon aktualisá tokante kondishonnan di entrada i seguridat na Canada, ta disponibel den e konseho di biahe pa Canada: https://www.nederlandwereldwijd.nl/reisadvies/canada 
• Informashon aktualisá tokante kondishonnan di entrada i seguridat na Mexico, ta disponibel den e konseho di biahe pa Mexico: https://www.nederlandwereldwijd.nl/reisadvies/mexico 

Gobièrnu di Korsou ta konsehá un i tur ku ta asistí na Mundial 2026, prepará nan biahe delantá i sigui tur medida di seguridat. Un bon preparashón ta yuda prevení kontratempu i ta permití bo disfruta di e eksperiensia úniko akí di Mundial ku mas trankilidat i seguridat. 

Klek aki pa algun konseho importante pa fanátikonan di Kòrsou ku ta bai Merka.

MAS NOTISIA

Gobièrnu di Kòrsou