Publiká riba 11 Novèmber 2026
Deklarashon di intenshon ta forma e siguiente paso den e trayekto di koperashon ku a kuminsá na 2024.
Willemstad, Kòrsou – Ministerio di Hustisia di Kòrsou i Ministerio di Hustisia i Seguridat Públiko di El Salvador tin e intenshon di firma un deklarashon di intenshon (Letter of Intent) djabièrnè próksimo, ku e meta pa fortalesé koperashon den área di hustisia i seguridat públiko. E koperashon ta enfoká prinsipalmente riba interkambio di konosementu, fortalesé institushonnan, kriminalidat ku ta traspasá frontera i e lucha kontra kriminalidat internashonal.
E base pa e koperashon aki a keda establesé dia 26 i 27 di novèmber 2024, ora ku Minister di Hustisia, mr. Shalten Hato, a partisipá na e konferensia internashonal Conferencia Internacional sobre Estado y Democracia (CIED 2024) na El Salvador. Durante e konferensia aki, unda temanan manera demokrasia, estado di derecho i seguridat públiko tabata sentral, Minister Hato a haña e oportunidat di konosé su kolega di El Salvador, Minister Héctor Gustavo Villatoro Funes.
E promé kontakto aki a forma e punto di salida pa eksplorá posibilidatnan di koperashon entre ámbos ministerio. Despues di konsulta i negosiashonnan na nivel di funshonario, Konseho di Minister di Kòrsou a duna su aprobashon na aprel 2025 pa drenta den e koperashon aki.
Interkambio di konosementu i fortalesementu di mantenshon di lei
E deklarashon di intenshon ta ofresé un kuadro pa koperashon den diferente área, entre otro pa kombatí krímen organisá, fortalesé organisashonnan polisial, maneho di migrashon i prevenshon di kriminalidat sibernétiko. Ademas, lo eksplorá posibilidatnan pa entrenamentu, bishitanan di trabou, koperashon tékniko i interkambio di konosementu, eksperensia i métodonan di trabou entre e instansianan kompetente di ámbos pais.
Minister Hato ta enfatisá e importansia di koperashon internashonal pa e desaroyo kontinuo di kadena hudisial na Kòrsou: “Koperashon internashonal ta brinda nos e oportunidat pa siña for di eksperensianan di otro pais i fortalesé nos propio manera di traha. Kada pais tin su propio retonan i solushonnan. Dor di interkambiá konosementu, nos por atkerí bista nobo ku ta kontribuí na un mantenshon di lei mas efektivo. Den esaki, nos propio legislashon, estado di derecho i protekshon di derechonan fundamental ta keda semper nos punto di salida. Nos meta final ta i ta keda un Kòrsou mas sigur.”
Mas koperashon dentro di e kuadronan legal
E deklarashon di intenshon tin un karakter orientativo i no ta krea obligashonnan hurídikamente pa e partidonan enbolbí. Eventual aktividatnan konkreto di koperashon lo ser elaborá mas aleu den konsulta mutuo, teniendo na kuenta e lei- i regulashonnan vigente i e kompetensianan di e instansianan enbolbí.
Señora Saran Magdalena-Inderson a aktua, bou di responsabilidat di Minister Hato, komo negoshadó prinsipal na nòmber di Kòrsou i a kordiná e konsultanan aki ku sr. Josué Roberto Liévano Paz, na banda di e outoridatnan di El Salvador.
Ku e deklarashon di intenshon aki, Kòrsou i El Salvador ta duna un siguiente paso den nan koperashon bilateral. E inisiativa aki ta kuadra ku e polítika di Ministerio di Hustisia pa sigui ampliá relashonnan di koperashon internashonal, profeshonalisá e kadena hudisial i fortalesé seguridat den komunidat di Kòrsou.
[FIN DI KOMUNIKADO DI PRENSA]
