Kòrsou i Microsoft ta firma akuerdo pa sostené su proseso di digitalisashon di e sistema di Enseñansa - Informashon tokante Gobièrnu di Kòrsou Bo opinion

Notisia

Kòrsou i Microsoft ta firma akuerdo pa sostené su proseso di digitalisashon di e sistema di Enseñansa

Geplaatst op 20 March 2021 dor di Ministerio Enseñansa, Siensia, Kultura & Deporte

WILLEMSTAD – Komo parti di e Koalishon Global di Edukashon (Global Education Coalition) lansá pa UNESCO na 2020 den kuadro di kolaborashon i interkambio pa protehá e derecho di enseñansa durante e interupshon sin presedente kousá pa e pandemia di COVID-19, Ministerio di Enseñansa, Siensia, Kultura i Deporte di Kòrsou (OWCS) i Microsoft a firma un Memorando di Entendimentu (MOU) pa apoyá Kòrsou den su proseso di digitalisashon di e sistema edukativo. Minister di OWCS, Sr. Steven Croes, a firma e MOU na nòmber di Gobièrnu di Kòrsou djamars 16 di mart último na Marriott Hotel.

E diálogo bilateral entre Microsoft i Minister di OWCS tabata fasilitá pa e Koalishon Global di Edukashon (Global Education Coalition) di UNESCO, ku ta un plataforma di kolaborashon ku ta permití konektividat pa sera e divishon digital i sigurá igualdat di genéro den region di Karibe.

Pa hasi Kòrsou mas resistente na desasternan natural i konvertí pais den un Smart Nation di bèrdat, ta importante pa buska mihó formanan pa mehorá alfabetisashon digital i krea un komunidat ku mas konosementu di teknología. Esaki ta nifiká ku mester kuminsá na rais dje komunidat dunando e mucha e ambiente edukashonal adekuá i e hèrmènnan pa prepará nan pa un futuro briante, di manera ku tur mucha por ta parti di Kòrsou su Smart Nation.

Ku firmamentu di e MOU akí, Minister di OWCS ta hasi posibel pa ofresé oportunidatnan igual na kada studiante di tur skol i asina ofresé un ambiente personal moderno di e-learning pa tur skol. Ta importante tambe ofresé un ambiente sigur di e-learning ku ta semper disponibel i aksesibel lòs for di e ora i lugá. Ta esensial pa tin un futuro forsa laboral orientá riba abilidatnan i konosementu teknológiko aktual i un infrastruktura mas sólido, pa asina tur skol por konektá i kumpli ku rekisitonan di seguridat i privasidat.

 Pa logra e ophetivonan akí, e minister a firma un partnership ku Microsoft na nòmber di Gobièrnu di Kòrsou pa implementashon di Microsoft 365 Education na hinter e Ministerio di OWCS, Direktivanan di Skol i skolnan. Ehekushon di e MOU ta tuma lugá den kolaborashon ku Inova Solutions, komo e sosio di mas grandi di Microsoft den region di Karibe, i NetPro Group, komo e sosio lokal di Microsoft pa empoderá komunidatnan i komèrsionan lokal.

**Riba e potrètnan athunto por tuma nota di e históriko ku a tuma lugá di forma semi-virtual:

Ministerio konserní