Publiká riba 15 Òktober 2018
Danki na e status outónomo ku Kòrsou por a bira miembro asosiá na UNESCO!
Willemstad- Kòrsou a bira miembro asosiá na The United Nations Educational, Scientific and Cultural Organization (UNESCO) riba: 25 October 2011.
Esaki danki na e echo ku Kòrsou a bira outónomo den Reino. Si Kòrsou a keda bou di yugo di Antia Hulandes, e ora ei ta Antia Hulandes a keda miembro di UNESCO. Esaki ta otro prueba mas ku Kòrsou su propio outonomia ta dun’é mas instrumento den su man pa e mes manehá su asuntunan independientemente.
UNESCO tin su base na Paris, Fransia. Su meta prinsipal ta pa kontribuí na pas i seguridat mundial dor di promové kolaborashon internashonal pa medio di reformanan edukashonal, sientífiko, i kultural pa asina oumentá rèspekt universal pa hustisia, lei i derechi humano huntu ku e libertat fundamental proklamá den e statuto di Nashonnan Uní.
Minister di e.o. Edukashon sra. Marilyn Alcalá-Wallé su empeño ta pa sigui informá komunidat korektamente. Un pueblo bon informá por opiná i sigui yuda eduká!
*******************************************
