Publiká riba 05 Òktober 2017
Djaweps 5 di òktober 2017, Promé Minister Eugene Rhuggenaath, huntu ku Minister di Desaroyo Ekonómiko Dr. Steven Martina, Minister di Tráfiko, Transporte i Planifikashon Urbano sra. Zita Jesus-Leito, i e partnernan Dolfijn FM, Ofisina di Turismo di Kòrsou, CHATA, Bureau Telecommunicatie & Post, UTS i Profound Projects a lansa e proyekto ‘Curaçao on the Map’ (‘Kòrsou Riba Mapa’).
‘Curaçao on the Map’ a kuminsá na 2016 i ta un inisiativa di DJ radial Joris Reer, anfitrion di e programa ‘Wakkere Joris’ na Dolfijn FM, den kooperashon ku e tempu ei Minister enkargá ku Desaroyo Ekonómiko Eugene Rhuggenaath, Ofisina di Turismo di Kòrsou i CHATA. E tempu ei a asta produsí un vidio* pa konvensé Google pa pone Kòrsou riba mapa. E vidio a lanta interes di Google, i esei a hiba na un reunion inisial na un playa, kaminda a start ku e proyekto.
Kòrsou a argumentá su petishon bon den e vidio i asina a bira e promé isla di Karibe ku lo keda digitalisá independientemente pa Google. Google a manda un kámara spesial Kòrsou, ku lo usa den e siguiente tres lunanan pa kapturá e imágennan pa Google Street View. Tin 15 lèns instalá riba mast di e Street View Trekker i kada un ta mustra den un otro direkshon pa krea un bista panorámiko di 360 grado. E Trekker ta instalá riba un pikòp patrosiná pa Dolfijn FM ku lo pasa den e kayanan di Kòrsou, inkluso tur área turístiko, otro lugá di interes i empresanan ku tin riba nos isla. Djaweps pasá, Promé Minister Rhuggenaath tabatin e onor di dirigí e promé Google Street View ‘collect’ pa Kòrsou, koriendo e pikòp den e kayanan di Handelskade, Punda, parti di e área ku ta riba lista di Patrimonio Mundial di UNESCO.
Ministerio di Desaroyo Ekonómiko i Ofisina di Turismo di Kòrsou a enkabesá e trabou di kompletá tur kontrato hurídiko i otro trámite nesesario pa strukturá un proyekto di e magnitut akí. Ministerio di Tráfiko, Transporte i Planifikashon Urbano, i su Bureau Telecommunicatie & Post ta responsabel pa e integridat i konfiabilidat di e infrastruktura pa por hasi posibel tur desaroyo ekonómiko digital. UTS su kontribushon ta inkluí spònser di aparatonan móbil pa e proseso di Google Trusted Verification. Profound Projects, partner ofisial di Google Cloud na Kòrsou, a yuda krea e eksperensia online pa doño di negoshi lokal registrá nan negoshi online.
Dokumentashon di e kayanan lo enserá basta trabou i ta hopi importante. Kada un di e kámaranan ta saka un potrèt kada 2,5 sekònde. Ta premirá ku e rekolekshon di imágen akí lo tuma mas o ménos 35 dia. Ora kaba di rekolektá tur imágen di e isla, lo manda nan pa Google prosesá, promé ku publiká nan online pa tur hende por disfrutá di nan. Na Kòrsou tin lei di privasidat similar na di otro pais ku ta protegé komunidat, i p’esei persona individual, number di outo i sierto otro imágen lo no ta rekonosibel, pero nos bunita paisahe, playa- i kayanan sí lo ta visibel.
Ademas di saka potrèt pa Street View, Kòrsou lo ta trahando riba vários otro aplikashon mas di Google, manera Google My Business, Google Expeditions i Google Trips. Ta spera ku una bes e proyekto ta kla, mas di 80% di e negoshinan lokal lo ta registrá riba Google My Business. Un invitashon ta bai na tur negoshi lokal pa registrá na www.curacaoonthemap.com, pa asina aparesé riba Google My Business. Google My Business ta un medio grátis i fásil ku negoshi i organisashon por usa pa manehá nan presensia online tur kaminda riba Google, inkluso Search i Maps. Bo tin ku djis verifiká i editá e datonan di bo negoshi, pa kliente por haña sa di bo i bo por splika nan di bo negoshi. E proyekto akí lo ofresé doñonan di negoshi un manera pa verifiká nan negoshi. Den e próksimo simannan, mas informashon lo aparesé den medionan di komunikashon, den materialnan imprimí i tambe online.
‘Curaçao on the Map’ ta pas bon den Kòrsou su strategia di término largu pa amplia sektor di turismo riba e isla i atraé mas turista for di tur parti di mundu pa bin bishitá nos. E lo ta masha útil pa poblashon lokal mes tambe, ya ku e lo hasi Kòrsou un isla mas ‘smart’ i digital, di akuerdo ku e metanan di gabinete Rhuggenaath i manera a stipulá den e programa di gobernashon ‘Realisando e Máksimo Potensial di Kòrsou’. ‘Curaçao on the Map’ lo nifiká mas efisiensia ora bo ke buska un negoshi lokal òf sitio di interes pa bishitá, loke lo generá un impakto ekonómiko positivo tambe pa nos negoshinan lokal.
