Kòrsou ta bai bira mas resistente ku UNOPS - Informashon tokante Gobièrnu di Kòrsou Bo opinion

Notisia

Kòrsou ta bai bira mas resistente ku UNOPS

Geplaatst op 19 March 2018 dor di Ministerio Tráfiko, Transporte i Planifikashon Urbano

Kòrsou ta bai bira mas resistente ku UNOPS su Resilience Program

Willemstad – United Nations Office for Project Services (UNOPS) a duna Konseho di Minister resientemente un presentashon amplio tokante e asina yama ‘Curacao Resilience Program’. UNOPS ta un organisashon di Nashonnan Uni ku ta konosí pa a yuda Gobièrnunan rònt mundu solushoná nan retonan riba tereno di infrastruktura, kompra di merkansia i medisina, i maneho di proyektonan kompleho.

‘Evidence based infrastructure’

‘Evidence based infrastructure’ ta un programa mundial di UNOPS i Universidat di Oxford na Inglatera pa sostené paisnan pa nan drecha nan infrastruktura i asina tene kuenta ku kambionan den futuro.  E método aki ta útil pa traha plan di maneho di infrastruktura i pa prepará pa entre otro desaster, kambionan klimatológiko den region i otro retonan den futuro. Ku e método aki, Kòrsou por traha riba un infrastruktura ku lo sostené aktividatnan sosio ekonómiko mihó, pa asina mehorá nos kalidat di bida i nos medio ambiente. 

Resientemente a reuní ku diferente grupo di interes tokante e trayekto aki. Kòrsou ta e promé pais den Karibe pa usa ‘evidence based infrastructure’ den diferente aspektonan di infrastruktura i uso di espasio. UNOPS ta duna sosten tékniko na Ministerio di Tráfiko, Transporte i Planifikashon Urbano (VVRP) ku e implementashon di ‘evidence based infrastructure’. Retonan importante ku lo bai traha riba dje di un manera integral ta awa residual, sushi, awa di bebe, energia i transporte. E manera di traha aki lo empoderá Kòrsou pa nos por tene kuenta mihó ku riesgonan, manera áwaseru fuerte, den plannan di infrastruktura riba un tèrmino mas largu i pa invershonnan nesesario.

Durante e próksimo lunanan, Gobièrnu huntu ku UNOPS ta sigui traha riba e programa pa Kòrsou. Den un kongreso regional na Kòrsou, ku Gobièrnu ta organisá huntu ku UNOPS, lo presentá e resultadonan di e implementashon di e programa ‘Evidence Based Infrastructure’.

 

 

 

 

 

 

Ministerio konserní