Publiká riba 23 Febrüari 2019
Willemstad – Kòrsou por bai konta den e periodo benidero (esta di mart te ku ougùstùs 2019) riba koperashon i sosten di Hulanda pa loke ta trata retonan sosial ku Gobìernu a bin ta enkontrá últimamente, entre otro komo konsekuensia di e migrashon íregular for di Venezuela. Esaki Gobièrnu di Hulanda a duna di konosé na Gobièrnu di Kòrsou den un karta ofisial di sekretario di estadio, Sr. Raymond Knops, na Promé Minister Rhuggenaath. E promesa di Hulanda aki na Kòrsou ta un promé reakshon riba e petishon di Gobìernu di Kòrsou pa asistensia tékniko basá riba Artíkulo 36 di Statüt di Reino Hulandes.
Ta trata aki di yudansa riba término korto ku prinsipalmente lo keda implementá den fase pa asina den forma éksitoso garantisá e resultadonan ku tin komo meta. Na promé lugá ta bai brinda asistensia tékniko pa establesé entre otro prosedura- i prosesonan adekuá pa atendé e fluho di estranhero. Esaki por inkluí entre otro entrenamentu i edukashon riba tereno di prosedura di protekshon, identifikashon i registro, akohida i trato di estranhero. Tambe lo brinda fondo i material nesesario riba tereno di salubridat públiko pa vakunashon i diagnósis.
Den un di dos fase lo bai pone mas énfasis riba optimalisashon di e fluho di estranhero, entre otro e proseso di regreso na pais di orígen (maneho di regreso i deportashon). Finalmente lo verifiká den ki forma por duna sosten adishonal den kuadro di vigilansia di frontera marítimo. Ademas Hulanda ta ofresé e posibilidat pa eventualmente fungi komo fasilitadó durante negosashonnan entre Kòrsou i organisashonnan di yudansa internashonal, manera International Organization for Migraton (IOM), UN Refugee Agency (UNHCR) i Krus Kòrá.
Den un siguiente kombersashon entre ambos gobièrnu lo sigui elaborá riba kontenido eksakto di e kolaborashon i sosten ku mester bai tuma lugá. Den e siguiente entrevista Promé Minister Eugene Rhuggenaath ta duna un splikashon mas aleu tokante e yudansa ku a pidi Hulanda i kon e yudansa aki lo benefisiá Kòrsou.
