Bo opinion

Notisia

Kòrsou ta ekspandé oportunidatnan internashonal ku lansamentu di iGuide Curaçao

Geplaatst op 03 December 2019 dor di Ministerio Desaroyo Ekonómiko

WILLEMSTAD- Ku orguyo nos ta anunsiá lansamentu ofisial di iGuide Curaçao.E plataforma di iGuide Curaçao ta un guia digital pa invershonistanan i ta wòrdu ouspisiá pa UNCTAD den estrecho kolaborashon ku International Chamber of Commerce (ICC).

 Lansamentu di iGuide Curaçao ta un esfuerso di Curacao Investment & Export Promotin Agency (CINEX) huntu ku Ministerio di Desaroyo Ekonomiko (MEO), Caribbean Export Development Agency, CAIPA & United Nations Conference on Trade & Development (UNCTAD).
Un di e tareanan di MEO ta, pa promové i stimulá invershonnan direkto for di eksterior. Pero tambe stimulashon aktivo di komersio internashonal i invershon na Kòrsou. Esakinan entre otro ta tareanan ku diariamente ta keda ehekutá pa e sektor di Koperashon Ekonómiko ku Eksterior denter di e ministerio.


Komo parti di e afan pa sigui engrandesé Kòrsou su potensial internashonalmente e ministerio huntu ku CINEX, UNCTAD i International Chamber of Commerce (ICC) resientemente a lansa e plataforma di iGuide Curaçao.
E propósito di iGuide Curaçao ta, ku esaki lo mester sirbi komo un hèrmènt klave pa posishoná Kòrsou stratégikamente den e merkado internashonal i kaptura asina e atenshon di potensial invershonistanan. UNCTAD huntu ku ICC a sòru pa duna e wèpsait aki forma i a konstruí esaki pues kompletamente for di punto di bista di e invershonista. Pa e motibu aki tambe, e plataforma di iGuide Curaçao ta kontené tur informashon ‘hands-on’ i relevante ku e invershonista lo por mester den un solo sitio. Riba iGuide Curaçao e invershonista lo por haña por ehèmpel informashon alkaso tokante gastunan di hasi negoshi na Kòrsou, oportunidatnan eksistente i kondishonnan aplikabel.


Pa Gobièrnu e lansamentu di e plataforma aki ta nifiká ku di e forma aki ta hasi e informashon mas aksesibel pero tambe ta fasilitá e proseso pa tene esaki tambe al dia. Mirando ku e informashon aki ta online kualke kambio lo por wòrdu aktualisá konstantemente lokual ta tene e plataforma fresku i alkaso. I e echo ku e informashon riba iGuides Curaçao ta optenibel den mas di 100 idioma ta un balor agregá pa boost e potensial internashonal di nos Pais
Un i tur por bishita e plataforma di iGuide Curaçao riba https://www.theiguides.org/public-docs/guides/curacao.
Kualke pregunta, update òf kisas informashon ku mester agregá laga nos sa via mail na vanessa.tore@gobiernu.cw

 

Ministerio konserní