Korsou ta firma akuerdo ku Merka pa ta sentro logístiko pa ayudo humanitario - Informashon tokante Gobièrnu di Kòrsou Bo opinion

Notisia

Korsou ta firma akuerdo ku Merka pa ta sentro logístiko pa ayudo humanitario

Geplaatst op 15 March 2019 dor di Ministerio Asuntunan General i Promé Minister

Willemstad – Kòrsou a firma djabièrnè un akuerdo ku Merka kaminda a fiha e palabrashonnan rondó di funshonamentu di Kòrsou komo hùp humanitario pa produktonan di ayudo pa Venezuela. E akuerdo ta firmá dor di Promé Minister Eugene Rhuggenaath na nòmber di Reino Hulandes i e Embahador di Merka na Hulanda, Sr. Pete Hoekstra, ku na e momentunan aki ta di bishita na Kòrsou.

Den e akuerdo tin indiká e konteksto i kondishonnan bou di kua Kòrsou lo funshoná komo un sentro humanitario. E akuerdonan ta formulá konforme e kondishonnan ku Gobièrnu di Kòrsou i Parlamentu i diskutí. Den e akuerdo ta enfatisá ku transportashon di e produkotnan di ayudo di Kòrsou pa Venezuela por tuma lugá solamente ora sirkunstansianan pèrmití esaki i e distribushon na Venezuela por sosodé di forma pasífiko. Te na momentu ku esei no ta e kaso, Kòrsou lo por fungi solamente komo tránsito pa manda produkto na otro pais pa depósito. Ademas den e akuerdo ta para ketu na e karakter humanitario di e yudansa i uso di e medionan di transporte síviko. Tambe tin indiká ku no lo bai hasi uso di FOL (Forward Operating Location) ku ta situá na Hato, ku por sierto por usa solamente pa kombatimentu di droga regionalmente.

Merka ta kubri tur gastu mará na uso di Kòrsou komo un sentro pa ayudo humanitario na Venezuela. Banda di esei Merka lo hasi uso di e posibilidat pa laga kompra di produktonan di ayudo humanitario tuma lugá na Kòrsou te kaminda esei ta posibel. Na momentu di ehekutá e tareanan ku tin di haber ku e yudansa humanitario, e tim di personal Merikano lo mester aktua semper konforme reglana di lei i regulashon di Kòrsou. Gobièrnu di Kòrsou na su turno lo hasi  tur loke ta nesesario pa garantisá e personanan aki nan seguridat.

Lo yega na mas palabrashon ku Minister di Asuntunan Eksterior, Sr. Stef Blok, kaminda ta stipulá ku mester tin aprobashon di Promé Minister di Kòrsou promé ku kualkier transporte di produkto den kuadro di e akuerdo aki por tuma lugá.

Riba e foto di robes pa drechi:  

Sra. Margaret Hawthorne, Kònsul General di Merka na Kòrsou, Sr. Pete Hoekstra, Embahador di Merka na Hulanda, Sr. Eugene Rhuggenaath, Promé-Minister di Kòrsou, Sr. Henne Schuwer, Embahador di Reino Hulandes na Merka.

Ministerio konserní