Kòrsou ta firma MOU ku Gobernador di La Guajira i Alkalde di Riohacha, Colombia - Informashon tokante Gobièrnu di Kòrsou Bo opinion

Notisia

Kòrsou ta firma MOU ku Gobernador di La Guajira i Alkalde di Riohacha, Colombia

Geplaatst op 27 November 2020 dor di Ministerio Desaroyo Ekonómiko

WILLEMSTAD – Djárason, 25 di novèmber, Minister di Desaroyo Ekonómiko Steven Martina a firma un Memorandum of Understanding (MOU) na nòmber di Gobièrnu di Kòrsou ku Nemesio Roys Garzon, Gobernador di Departamento de La Guajira i José Ramiro Bermudez Cótez, Alkalde di Riohacha, Colombia. 

E MOU aki ta enserá un akuerdo di union ku ta kubri koperashon, kolaborashon i apoyo tékniko den e área di interkambio komersial, turismo, transporte i sektor di energia alternativo. Abase di e akuerdo akí, Gobièrnu di Kòrsou ta bai forma gruponan di trabou huntu ku e entidatnan di La Guajira i Riohacha pa asina duna kontenido na e MOU.

Durante e último añanan Gobièrnu di Kòrsou ya a realisá algun bishita na Riohacha, La Guajira, kual a resultá den diferente akuerdonan sólido di koperashon i kolaborashon entre e paisnan. Mirando esaki, ta importante pa sigui fortalesé e akuerdonan ku ya a keda establesé i sera akuerdonan nobo kaminda e oportunidat pa esaki presentá. 

Colombia ta un partner di komèrsio sumamente atraktivo pa Kòrsou. Esaki, mirando ku tantu Kòrsou komo Colombia, den e kaso di Riohacha tin un pasado kompartí i sin lubidá e echo ku no tin barera di idioma entre e dos paisnan.

Ku firmamentu di e MOU akí, Kòrsou i Colombia ta bai pa un era nobo di koperashon mutuo.

 

Ministerio konserní