Publiká riba 25 Novèmber 2019
Willemstad – Dia 25 di novèmber ta konmemorá Dia Internashonal pa Eliminá Violensia kontra Hende Muhé. Nashonnan Uní ta di opinion ku e dia aki mester keda konmemorá anualmente pa por yega na eliminashon di un di e violashonnan di derechi humano mas persistente i devastador.
Lamentabelmente por bisa ku na Kòrsou tambe mester konmemorá e dia aki, ya ku na Kòrsou tambe nos konosé violensia kontra hende muhé den diferente forma. Ta traha konkretamente na eliminashon di violensia kontra hende muhé pa medio di ehekushon di e Plan Nashonal kontra Violensia. Na Kòrsou e plan aki ta enserá violensia doméstiko, violensia relashonal i abuzu di mucha i hóben. Pues, e tin un base mas amplio ku solamente hende muhé i mucha muhé.
Pa medio di e poko sifranan disponibel i diferente kaso leve i grave di violensia i abuzu ku ta yega na orea di gobièrnu, por konstatá ku ta nesesario organisá e manera ku ta tantu atendé ku e kasonan, pero tambe e organisashon kaminda ta raportá si akaso esaki ta nesesario.
Kòrsou lo bai introdusí un manera uniforme pa atendé ku violensia doméstiko, relashonal i violensia kontra mucha i hóben. Den kuadro di e introdukshon aki, ku lo tuma lugá den 2020, Plataforma Plan Nashonal Kontra Violensia a organisá un mini konferensia riba Dia Internashonal pa Eliminá Violensia kontra Hende Muhé.
E mini konferensia aki a konta ku partisipashon di orador di diferente organisashon ku ta traha riba e tereno en kuestion. E organisashonnan ku a presentá ta “Centraal Meldpunt Kindermishandeling”, fundashon AJJC, fundashon “Slachtofferhulp” i Kuerpo Polisial Kòrsou. Ademas e mini konferensia a konta ku presentashon di e neurosikólogo lokal Rodney Stewart, kende a elaborá riba e importansia pa tin un protokòl di trabou.
Na final di e konferensia, Erel Everitz di sektor Famia i Hubentut di Ministerio di Desaroyo Sosial, Labor i Bienestar a presentá e stapnan komo parti di e protokòl ku lo introdusí na aña 2020. Awor lo bai kaba di hasi e trabounan preparativo pa por introdusí e protokòl. Tambe lo traha riba un punto sentral pa mèldu maltrato i abuzu.
Tambe a lansa e página di Facebook di Plan Nashonal kontra Violensia. Riba e página aki lo kompartí informashon tokante e plan i su ehekushon ku komunidat, pero tambe lo hasi uzo di e página pa hiba kampañanan di konsientisashon, un paso importante pa logra kambio di komportashon den nos komunidat.
Pa mas informashon, por fabor bishitá Plan Nashonal kontra Violensia riba Facebook òf yama 434 04 28 òf 434 04 51 pa mas informashon.
