Publiká riba 15 Yüli 2023
WILLEMSTAD – Gobièrnu di Kòrsou ta tuma un paso importante e siman benidero den eksplorá e posibilidat di generá energia ku molinanan di bientu riba laman. Fugro (un empresa spesialisá hulandes) a risibí e enkargo di Gobièrnu di Kòrsou pa realisá un estudio geofísiko di e fondo di laman den awanan rondó di Kòrsou, ku su bapor yamá M.V. Fugro Brasilis. Fugro lo realisá e estudio durante e periodo di 17 pa 29 di yüli di e aña akí.
E estudio ta di suma importansia den Gobièrnu su esfuerso pa produsí energia duradero for di bientu, inkluso hidrógeno bèrdè, komo parti di un transishon energétiko kompleto den nos pais i pa krea e kapasidat di un kadena di produkshon i eksportashon pa entre otro produsí kombustibel limpi. Pa esaki Gobièrnu a firma un MOU ku minister Jetten di Klima i Energia na luna di mei di e aña akí.
Meta di e investigashon ku Fugro lo realisá ta pa kolektá datonan preliminar ku ta nesesario pa identifiká i deliniá kua área ta mas adekuá pa posiblemente keda konsiderá komo lokalidatnan pa konstruí plataformanan flotante di molinanan di bientu ku ta ankrá den fondo di laman. E estudio lo keda realisá usando sensornan di laman hundu, entre otro pa krea un imágen tridimenshonal di e fondo di laman. E área di investigashon ta ekstendé te na frontera di e Zona Ekonómiko Esklusivo di Kòrsou i e fronteranan di Venezuela, Aruba i Boneiru.
Produkshon di hidrógeno bèrdè ku uso di energía renobá for di bientu ta funshoná komo katalisadó pa un transishon rápido di 100% di fuentenan di energia renobá na Kòrsou, miéntras ta krea un potensial konsiderabel pa eksportashon di hidrógeno bèrdè i kombustibel sintétiko, i e posibilidat pa sostené industrianan di energia limpi intensivo.
E ambishon pa bira líder regional den produkshon di hidrógeno bèrdè usando energia di bientu ta resultá for di un estudio realisá pa TNO, un organisashon independiente hulandes ku ta realisá investigashonnan sientífiko apliká. Un estudio inisial a mustra ku Kòrsou, dor di su posishon geográfiko i kondishonnan di tempu, tin un oportunidat úniko pa logra rendementu máksimo den generashon di energia di bientu. Esaki ta forma punto di salida di un trayekto ku ainda ta den fase inisial di eksplorashon di e diferente posibilidatnan i tambe evaluashon di e viabilidat i deseabilidat di e opshonan. E estudio ku Fugro lo realisá ta forma parti di esaki.
Desaroyo i preparashon di e megaproyekto akí i en espesial e esfuerso pa eksplorá posibel lokalidatnan pa e molinananan di bientu, ta keda hasí pa un grupo di trabou konsistiendo di kuater ministerio (Asuntu General, Desaroyo Ekonómiko, Salubridat, Naturalesa i Medio Ambiente, i Tráfiko, Transporte i Planifikashon Urbano) i tambe kuater kompanianan di gobièrnu, esta Curoil, Refineria di Kòrsou, Aqualectra i Curaçao Port Authority. E grupo di trabou akí ta responsabilisá na un grupo di direkshon ehekutivo ku ta konsistí di e kuater ministerionan ya menshoná.
