Publiká riba 29 Febrüari 2024
Willemstad- Dia 16 di Febrüari último a tuma lugá un seshon di mesa rondó riba avansenan den e implementashon di Kòrsou su Strategia Nashonal di Eksportashon (NES). Durante e seshonnan akí, tabata tin diferente punto den e NES riba kua a nota progresonan signifikante i esaki ta un gran satisfakshon i orguyo pa tantu Minister di Desaroyo Ekonómiko, sr. Ruisandro Cijntje komo tambe pa Ministerio di Desaroyo Ekonómiko (MEO).
Ya ta kasi dos (2) aña ku nos ta trahando konhuntamente ku stakeholdersnan tantu den sektor públiko komo sektor privá pa por yega na implementashon di nos NES. Áreanan ku a bini dilanti durante e seshon di mesa rondó dia 16 di febrüari último kaminda sigur tabata tin un kresementu signifikante, tabata entre otro e sektor di Informashon i Teknologia (IT) lokal. Avansenan den e sektor akí ta enserá por ehèmpel, un gran paso den direkshon di fortifikashon di nos infrastruktura digital i konektividat ku e Asosiashon nobo di Sentronan di Data Karibense ( Caribbean Data Centres Association). Tambe, avansenan den e ‘Digital Hub Americas’ kende ta fungi komo un piedra angular pa e sektor di IT lokal, primintiendo di alsa tantu nos kapabilidatnan teknológiko komo inovashon. Mas aleu den e aña akí, lo lansa tambe un programa di inkubashon teknológiko ku lo fungi komo un plataforma pa mentor i aselerá desaroyonan riba tereno di inteligensia artifisial.
E sektor di Servisionan Finansiero tambe a krese inmensamente. E fasilidat nobo di ‘Safe Financial Corridor’ ta fasilitá invershonnan na Sürnam hasiendo uso di institushonnan bankario di Kòrsou, interkambionan di seguridat i kompanianan di trust. Na e momentunan akí, tin seis (6) legislashon di impuesto serka Parlamento di Kòrsou, pa modernisá nos régimen di impuesto i aliniá esaki ku standardnan internashonal. Esaki, spesialmente den antisipashon di e ‘Financial Action Task Force Audit’ ku lo tuma lugá e aña akí riba partikularmente e akuerdo ku Union Oropeo tokante interkambionan di informashon outomátiko pa loke ta trata kuentanan finansiero.
Durante di e seshon di mesa rondó, a bini dilanti tambe e adelantonan den nos sektor Kreativo i sektor di Turismo Médiko i ‘Wellness’. Pa loke ta trata nos Industria Kreativo, 
a anunsiá resientemente un komité ku lo bai traha pa establesé un asosiashon lokal pa e sektor akí ku lo ta dediká na krea un definishon unánime kiko e Industria Kreativo na Kòrsou ta enserá i aliniá henter e sektor. Mientrastantu e sektor di Turismo Médiko i ‘wellness’ ta moviendo den direkshon di establesé un asosiashon dediká na e parti di ‘Wellness’ pa por promové un sektor mas unifiká i ku un gran balor agregá. Aktividatnan adishonal den e sektor ta enserá entre otro e trabounan konhunto ku edukadornan den área di tantu ‘Wellness” komo tambe medisina alternativo.
Áreanan di prioridat awor akí den e trabounan pa implementá e NES ta inkluí, aktualisashon di nos legislashonnan nesesario i pasa leinan pendiente komo tambe traha riba kapasitashon den otro ministerionan. Na e momentunan akí Stichting Overheids Accountant Bureau (SOAB), bou di liderazgo di MEO, ta dunando su aporte den kordinashon di e esfuersonan i sigui e progreso i resultadonan den e trayekto di implementashon di NES. E Strategia Nashonal di Eksportashon akí tin komo ophetivo pa krea kuponan di trabou, alsa abilidatnan lokal, mehorá prosedimentunan atministrativo, oumentá ingreso di divisa i fortalesé nos pais su presensia regional. Pa por logra e ophetivonan akí ta rekerí esfuerso i dedikashon di esnan na enkargo di traha maneho den nos pais. Esaki, kombiná ku e agilidat i entrega di sektor privá. Esakinan huntu, ta pone Kòrsou riba e bon kaminda pa kumpli ku e vishon stratégiko di NES, esta ‘Kòrsou- kaminda negoshinan ta prosperá’
