Publiká riba 06 Febrüari 2025
WILLEMSTAD – Kas di Kòrsou den kolaborashon ku Gobièrnu di Kòrsou, ta organisá e di dos edishon di e konferensia diplomátiko ku enfóke riba Embahadornan. E aña akí e konferensia lo karga e nòmber i título di “Curaçao Connects Ambassadors Conference 2025: Connecting Nations, Shaping Futures”.
Meta prinsipal di e konferensia ta pa posishoná Kòrsou komo un plataforma internashonal pa kolaborashon, inspirando relashonnan duradero, desaroyo ekonómiko i interkambio kultural. Ademas, e konferensia ta duna e Embahadornan un oportunidat úniko pa interaktuá ku outoridatnan lokal, fortalesé relashonnan bilateral i kontribuí na e integrashon diplomátiko den Reino Hulandes.
Dianan 10 pa 14 di febrüari, embahadornan di mas o ménos 20 diferente pais lo bishitá nos dushi isla pa partisipá na e konferensia i tambe eksperensiá e kultura di nos pais. Despues di e promé edishon organisá na 2024, Kòrsou huntu ku Colombia a logra yega na un interkambio di eksperensia kultural pa medio di grupo di baile di hóbennan. Esaki kaminda algun hóben a bai Colombia i tambe algun hóben di Colombia a bini Kòrsou pa interkambiá i siña di otro su kustumber i kultura den e área di baile. Netamente e tipo di akshonnan akí ta e base pa demostrá i duna bida na esensia di e konferensia.
E konferensia akí ta brinda e oportunidat pa Embahadornan deskubrí, eksperensiá i konektá ku nos isla di un manera ekstraordinario. E programa di e konferensia ta duna oportunidat pa drenta den kontakto ku outoridatnan lokal i otro stakeholder pa intensifiká relashonnan bilateral i fortalesé kolaborashonnan. Kòrsou ta keda transformá den un sentro diplomátiko pa negoshi, inovashon i kultura.
“Curaçao Connects Ambassadors Conference 2025: Connecting Nations, Shaping Futures“ no ta solamente un konferensia, e ta un evento ku ta presentá nos isla komo un pilar pa kolaborashon internashonal. E proyekto akí ta krea oportunidatnan nobo pa desaroyo ekonómiko i interkambio kultural, promoviendo inovashon i un futuro di relashonnan bilateral.
