Ministerio di Enseñansa, Siensia, Kultura & Deporte a organisá riba 10-10-2018 un seremonia ofisial na Wilhelminaplein kaminda ta “Reflehá i Selebrá” Kòrsou.
E programa a keda habrí pa Kor Angelitos ku a hasi e apertura ofisial kantando e himno di Pais Kòrsou den presensia di su Ekselensia Gobernador, Minister-President, Ministernan, Presidente di Parlamento, Parlamentarionan, Konseho di Iglesia, Dignitarionan i demas invitadonan. Despues a sigui ku palabra di enkurashamento di Rev. L. Wearen, Rev. Iman Adnan, Rev. G. Bakhuis i Monseigneur Luis Secco.
Minister di Enseñansa, Siensia, Kultura & Deporte sra. Marilyn Alcalá-Wallé a hiba palabra kaminda Minister a elaborá riba e tema “Kòrsou tin su mes destino den su man”, pasando asina den e pasado, presente i futuro kaminda nos ta bai wak den e binokular pa nos sigui traha huntu pa un mihó Kòrsou.
Durante di e anochi a presentá un video di e historia di nos outonomia ku a kuminsá for di 1499 te ku awe 2018. Tambe a presentá un produkshon di sra. Mavis Albertina ku a mustra i elaborá riba e Konferensia di Mesa rondó na 2010 ku a hiba nos na nos Outónomia na 10-10-2010. E dos produkshonnan aki ta di gran balor pa nos historia keda bibu den nos komunidat.
E anochi a keda klousurá ku un bríndis kaminda Gabinete Rhuggenaath huntu ku Gobernador a felisitá Pueblo di Kòrsou ku e di 8 aniversario di nos Pais Outónomo den reino.
******************************************
