Publiká riba 28 Mart 2024
Willemstad – Riba 26 di mart, Minister Charles Cooper a reuní ku Sr. Ahab Downer di ‘Expertise France’ huntu ku su tim, i representantenan di Gobièrnu di Kòrsou tokante e petishon ku Kòrsou a hasi pa por risibí fondonan di Union Europeo pa maneho di awa sushi.
Sr. Ahab Downer ta e Direktor di e Programa “Green Overseas” (“GO”). E programa aki, ku ta ser finansiá pa Uniion Europeo i implementá pa ‘Expertise France’, tin komo meta pa sostené esfuersonan efektivo i signifikante di resilensia kontra kambio klimatologiko i transishon di energia den 25 pais i teritorionan ultramar di Unión Europeo i Reino Uni. Promé ku asumí e liderato di e Programa GO, Sr. Ahab Downer tabatin e privilegio di liderá esfuersonan ambisioso i impaktante similar, guiá pa siensia den desaroyo sostenibel, i tambe inisiativanan pa konservashon di bida salbahe i terenonan salbahe den un variedat di regionnan ku ta inkluí Medio Oriente, Afrika Sentral i Sur, Asia Sudeste, i Pasífiko Sur.
Debí na maneho defisiente di awa den e últimonan dékada na Kòrsou, diferente tipo di awa sushi ta wòrdu bashá den e ekosistemánan natural sin ta tratá. Esaki ta polushona e kalidat di e awanan di fondo i di superfisie. Esaki ta impliká ku awa na e playanan tambe ta bira mas malu, miéntras ku e kalidat di e ekosistema di koral y biodiversidat ta sigui baha. Tin kapasidat insufisiente pa trata e awa sushi efisientemente via di e plantanan sentralisá di tratamentu di awa sushi. E planta di tratamentu mas grandi na Klein Hofje ta traha riba su kapasidat i mester ser renobá.
Otro puntonan importante ta falta di regulashonnan adekuado pa prevení deskargamentu di awa sushi den nos awanan superfisial, i falta di invershon di kapital di parti di gobièrnu pa atendé e problema. Mehorashon di resilensia kontra kambio klimatológiko dor di maneho di awa i sanidat ta enfoke pa e ‘partnership’ di Union Europeo (EU) i Kòrsou despues di 2020. Mirando e riesgonan, impaktonan, i vulnerabilidatnan di kambio klimatológiko riba maneho di awa sushi, Gobièrnu di Kòrsou mester antisipá i ser eduká tokante kon pa respondé na riesgonan klimatológiko aktual i kambio klimatológiko relashoná ku tratamentu di awa sushi.
Pues, Gobièrnu di Kòrsou mester di sosten di e Programa GO di Union Europep pa investigá i proveé guia riba posibel desishonnan pa teknologianan di tratamentu di awa sushi resiliente na klima na Kòrsou. E akshon ta involukrá kuater komponente, kual ta inkluí:
– un análisis i diagnóstiko,
– deskripshonnan tékniko detayá,
– un kampaña di konsientisashon piloto, i
– un deskripshon di e impaktonan di kambio klimatológiko riba e maneho di awa sushi.
Presente na e reunion di parti di Expertise France tabata Sr. Ahab Downer, Sr. Robert Moons, i
Sra. Lina Tode. Di parti di Gobièrnu di Kòrsou tabata tei Sr. Franklin Gilbert di Servisio pa Obra Públiko i Sra. Judric Pietersz di Ministerio di Asuntunan General. Minister Cooper a risibí un bista di kon e petishon ku Kòrsou a hasi ta kanando pa por risibí parti di fondonan di Union Europeo pa maneho di awa na Kòrsou. Ta trata di e programa GO di EU pa 18.7 mion euro pa 25 LGO rònt mundu, di kual Kòrsou ta risibí EUR 160.000.
