Kòrsou ta risibí reprodukshon di un mapa di Kòrsou históriko data di siglo 17 - Informashon tokante Gobièrnu di Kòrsou

Notisia

Ministerio konserní Desaroyo Ekonómiko
 

Kòrsou ta risibí reprodukshon di un mapa di Kòrsou históriko data di siglo 17

Publiká riba 04 Aprel 2022


Willemstad –
Komo muestra di e kolaborashon entre Archivo Nashonal di Hulanda i e Archivo Nashonal di Kòrsou, minister Ornelio Martina a risibí resientemente un reprodukshon di e mapa di Kòrsou ku ta data for di siglo 17.

Dia 17 di sèptèmber 2021, minister mr. Ornelio Martina a bishitá Archivo Nashonal di Hulanda huntu ku Drs. M.A. Scriwanek kende ta hefe di Archivo Nashonal Kòrsou, pa por hiba kombersashonnan tokante un programa di kooperashon riba tereno di instalashon di depósitonan elektróniko. Den kuadro di esaki, Ir. A. Agema kende ta hefe di digitalisashon di Archivo Nashonal di Hulanda, a realisá un bishita na Kòrsou i tambe serka minister Martina. E intenshon ta, pa riba término kòrtiku firma un ‘Memorandum of Understanding’ (MoU), entre Hulanda i Kòrsou kaminda ta konkretisá e proseso di koperashon i kolaborashon entre e Archivo Nashonal di Hulanda i Kòrsou.

Durante e kombersashonnan ku ya ta andando, minister Martina a risibí un opsekio di parti e Archivo Nashonal di Hulanda kual ta reprodukshon di un mapa históriko di Kòrsou ku ta data di siglo XVII (17). E mapa akí a keda pintá dor di sr. Gerard van Keulen, un kartógrafo di Amsterdam. Un edishon ku ta parti di Archivo Antiguo di Kòrsou kaminda tin entre otro e historia di Tula wardá, tambe a keda regalá na Archivo Nashonal di Kòrsou. E último akí ta disponibel den forma di microfilm i ta aksesibel awor pa públiko den sala di lektura di Archivo Nashonal di Kòrsou.

Aktualmente na Den Haag te ku 23 di òktober 2022, ta realisando un gran eksposishon yamá: “Kòrsou- Curaçao. Bosnan di pasado, hendenan di awe”. Tantu e Archivo Nashonal di Kòrsou komo esun na Hulanda ta dunando un  kolaborashon aktivo na realisashon di e eksposishon akí, dor di eksponé nan fuentenan i programa edukativo.