Kòrsou ta selebrá e promé Dia Internashonal di Enseñansa - Informashon tokante Gobièrnu di Kòrsou

Notisia

Ministerio konserní Enseñansa, Siensia, Kultura & Deporte
 

Kòrsou ta selebrá e promé Dia Internashonal di Enseñansa

Publiká riba 23 Yanüari 2019

Resientemente e organisashon UNESCO a proklamá 24 di yanüari komo Dia Internashonal di Enseñansa. Esaki ta promé biaha den história ku mundialmente, paisnan ku ta miembro (asosiá) ta selebrá Dia International di Enseñansa huntu. Kòrsou ku ta miembro asosiá di UNESCO, tambe ta selebrá e dia aki.

Segun UNESCO enseñansa no ta solamente un derecho humano, pero alabes ta forma base pa desaroyo sostenibel den un komunidat. Pa medio di enseñansa, ta amplia konosementu, abilidatnan profeshonal, balornan i aktitut pa kombertí desaroyo sostenibel den práktika i krea solushonnan inovativo. Esaki ta di sumo importansia pa nos pais i pa keda den konekshon ku mundu.
Punto di salida ta ku kada persona mester tin akseso na posibilidatnan pa sigui desaroyá su mes pa bida largu (life long learning). Di e forma aki ta krea e oportunidat pa e persona por sigui siña, amplia su konosementu i abilidatnan pa keda kontribuí na edifikashon di su pais.

Ku e proklamashon di Dia di Enseñansa, tur e paisnan ku ta miembro (asosiá) di UNESCO ta demonstrá nan deseo pa huntu yega na akshonnan ku ta hiba na enseñansa inkusivo, ekitativo i di kalidat haltu. Tur esakinan ta inkluí den e Meta di Desaroyo Sostenibel nr 4 di UNESCO (SDG 4) ku ta fihá riba enseñansa. Un di e métanan prinsipal ta pa tur mucha tin akseso na un bon desaroyo, kuido i pre-eskolar pa asina nan ta keda formá i ekipá pa enseñansa di fundeshi.
Pa e motibu aki, Ministerio di Enseñansa, Siensia, Kultura i Deporte (ESKD), den koperashon ku UNESCO Curaçao ta pone atenshon na e téma di edukashon pre-eskolar. Edukashon pre-eskolar ta e base sólido di formashon di kada mucha.
Ministerio di ESKD ta organisá un dia di formashon pa tur skolnan pre eskolar i organisashonnan relashoná ku e téma, riba Dia Internashonal di Enseñansa na Hòfi Kalabash. Durante di dia tin diferente presentashon i diskushon riba e.o vishon i maneho pre-eskolar.

Minister Marilyn Alcalá-Wallé ta gradisí un i tur ku ta duna nan aporte balioso den e kampo di enseñansa.

Felis Dia di Enseñansa 2019.