Publiká riba 07 Desèmber 2021
SIMPSON BAY, St. Maarten- Den luna di novèmber 2 miembro di ‘Directie Risicobeheersing & Rampenbeleid’ (DRR) huntu ku un miembro di Curaçao Airport Partners (CAP) i un ‘Drill Master’ di Concilium Training & Development, a biaha pa St.Maarten pa asina kordiná e ehersisio ‘Aerodrome Emergency Drill Exercise’ na aeropuerto di St.Maarten (PJIA).
E ehersisio a ser organisá en konekshon ku e eksigensia pa tur aeropuerto sigui e regulashonnan di ‘International Civil Aviation Organization’ (ICAO), ku ta stipulá e lei- i reglanan ku tur aeropuerto rònt mundu mester kumpli kuné. Esaki entre otro ta nifiká ku kada dos aña mester organisá un ehersisio ‘full scale’ na aeropuertonan asina e aeropuerto por keda akreditá konforme reglanan di ICAO. E aña akí a toka turno na aeropuerto di St. Maarten pa ser akreditá di nobo dor di ICAO, i den e kuadro akí a organisá e ehersisio ‘’full scale’. Debí na eksperensia ku DRR tin huntu ku otro ekspertonan a puntra yudansa di Kòrsou pa duna un man ku organisashon di e ehersisio.
E ehersisio ‘full scale’ a ser prepará i kordiná dor di un eksperto riba e tereno akí i ku tin mas ku 16 aña di eksperensia. E ehersisio a tuma lugá dia 2 di novèmber último i e senario pa e ehersisio tabata unu amplio ku ta kontené e metanan prinsipal riba kua ICAO ke mira mehorashon na St. Maarten. E senario tabata enserá un ‘crash of a wide body Jet’ ku mas ku 90 persona abordo i tur e organisashonnan mester a respondé konforme e plan di emergensia di aeropuerto.
E miembronan di DRR inkluso e miembro di CAP ku tambe a yega di kordiná diferente ehersisio similar na e.o. aeropuerto di Kòrsou i Boneiru, a yuda ku opservashon i a duna input pa e ehersisio por ta un éksito. E ekspertisio di e miembro di CAP den e ramo di trabou akí tabata un ayudo enorme, lokual koleganan di St.Maarten a gradisié tambe p’e.
DRR ta rekonosé e importansia di kontribuí ku paisnan den Reino pa asina por sigui aportá na desaroyo di preparashon den e área di krísis i kalamidat.
