Ministerio konserní
Kòrsou tur dia ku toke de keda di 9’or di anochi pa 6’or di mainta
Publiká riba 28 Mart 2020
E ta keda asina te un próksimo aviso
Willemstad – For di awe, djasabra 28 di mart 2020, Kòrsou ta introdusí TOKE DE KEDA di 9’or di anochi pa 6’or di mainta. Esaki ta nifiká ku desde awe:
- Ningun hende no por ta riba kaya entre 9’or di anochi i 6’or di mainta.
- Na kas no por tin fiesta, ta hende ku ta biba so mester ta den kas.
- Si bo ta kuida un hende na su kas, bo por bai su kas i kuida e persona aki na su kas, sin ku bo por sali durante e orario di 9’or di anochi pa 6’or di mainta.
- Personanan ku ta traha den funshon i prosesonan vital por ta riba kaya entre 9’or di anochi pa 6’or di mainta – solamente si ta nesesario i si e persona ta indentifiká. Algun funshon vital ta entre otro, polis, dòkter, enfermero i algun representante di Gobernashon. Den kaso di proseso vital ta trata di entre otro, urgensha i emergensia médiko.
- Kompanianan di seguridat ku ta identifiká komo tal, tambe ta riba kaya durante e orario di 9’or di anochi pa 6’or di mainta.
- Negoshinan ta sera 6’or di atardi, ku eksepshon di supermerkado, hardware, botika, toko i pòmp di gasolin ku ta sera 1 ora mas lat, esta 7’or di anochi.
- Trùk di pan i restorantnan tambe ta sera 7’or di anochi. Orarionan di trùk di pan ta kambia por lo pronto di 12’or di mèrdia te 7ʹor di anochi.
- Transporte públiko tin te ku 9’or di anochi pa transportá su kliente, di moda ku si un hende kaba di traha 7’or, e tin te ku 9’or pa yega su kas.
- Ofisinanan di number ta keda habrí te 6 ‘or di anochi. Fundashon Wega di Number Kòrsou mes ta publiká e orario ku tin sorteo.
Riba www.gobiernu.cw bo por haña mas informashon kon pa bin na remarke pa eksonerashon. Ademas, e lista di funshon òf prosesonan vital tambe ta riba e página wèp.
Outoridatnan tin tur outorisashon pa aktua den kasonan ku hende no ta tene nan mes na e toke de keda. Asumí bo responsabilidat i keda kas.
