Publiká riba 28 Novèmber 2019
Willemstad – Gobièrnu ta mira e desishon di Korte di Hustisia pa ku e petishon di sindikatonan ABVO, NAPB, SITEK, STrAF i SAP pa por pone beslag riba akshonnan di gobièrnu den algun kompania di estado, komo sosten na Gobièrnu pa sigui hasi tur esfuerso pa yega na presupuestonan balansá. Korte di Hustisia a konkluí ku e loke sindikatonan ta pidi no por ya ku dividendonan aki, tumando na konsiderashon e ‘aanwijzing’ resien, ta sirbi pa yuda trese presupuesto den balansa.
Pone beslag riba akshon i dividendo ta algu mal pensá
Gobièrnu tin komprenshon pa e echo ku sindikatonan ABVO, NAPB, SITEK, STrAF i SAP ta hasi esfuerso pa sali pa derecho di nan miembronan. Gobièrnu ta di opinion tambe ku tur lucha mester keda hibá den kuadro di loke ta hustu i rasonabel. Esaki ta nifiká ku bo no ta eksigí algu sabiendo ku ta algu ku ta bai kontra òf a kosto di interes general.
Ta konosí ku Gobièrnu, sigur for di 2014 bini ariba, a bini ta dependé di entradanan di dividendo di kompanianan estatal pa por yega na presupuestonan balansá. Un i tur por tuma nota por ehèmpel di korespondensia entre di Cft i Gobièrnu riba e tópiko. Dirigentenan di sindikatonan ABVO, NAPB, SITEK, STrAF i SAP por a tuma nota for di e diskushonnan aki ku entradanan di dividendo ta entradanan ku Gobièrnu ta konta ariba den su presupuesto. P’esei Gobièrnu a keda altamente sorprendí di e intento di e dirigentenan sindikal aki pa pone beslag riba akshonnan den empresanan estatal i riba dividendo. Ta un paso, manera por lesa den e desishon di Korte di Hustisia, ku ta hasi daño na funshonamentu di Gobièrnu i interes general.
Gobièrnu a hasi esfuerso pa papia i splika kada ámtenar personalmente
Gobièrnu, durante di lunanan tras di lomba, a organisá mas ku 60 seshon di informashon den tur e 9 ministerionan durante kua a splika empleadonan públiko na plaka chikí ku situashon ekonómiko di Kòrsou a buta ku entradanan di Gobièrnu a bai atras di tal forma ku kòrtamentu den gastunan a inevitabel. Gobièrnu ta mira bèk ku satisfakshon riba e seshonnan aki ya ku e gran mayoria di empleadonan públiko ku a asistí na e seshonnan aki a ekspresá di ta komprendé ku Gobièrnu, den e situashon aki, no por ta dunando oumento di salario siendo no ta eksistí un obligashon pa hasi esei.
Sindikatonan ta insistí riba algu pa kua nan no tin rason
Sindikatonan ABVO, NAPB, SITEK, STrAF i SAP, riba 19 di novèmber último, a akudí na Korte di Hustisia ku e petishon pa pone beslag riba akshonnan den (1) Dutch Caribean Air Curaçao Navigation Service Provider NV, (2) Curaçao Airport Holding NV i (3) Curaçao Oil NV i riba dividendo ku Gobièrnu lo mester risibí di e kompanianan aki. E intento aki ta unu mas, despues ku e sindikatonan aki pa medio di wèlga na kuminsamentu di aña a trata na pone preshon riba Gobièrnu, pa obligá Gobièrnu pa paga e lùmpsùm di 3% i indeksashon di salarionan di trahadónan den sektor públiko. Korte di Hustisia, manera ta konosí, a para e wèlga i a manda partidonan pa bai mesa.
Gobièrnu a kumpli kabalmente ku órden di Korte di Hustisia i a sinta na mesa ku sindikatonan. Gobièrnu a splika i proba ku lei no ta obligá Gobièrnu na hasi pago di e lumpsum di 3% i di indeksashon na trahadónan. Pago di e oumento salarial pa medio di e 3% i di indeksashon a bini ta tuma lugá tanten e forsa finansiero di Gobièrnu tabata permití. Sindikatonan ABVO, NAPB, SITEK, STrAF i SAP di nan banda a keda insistí ku Gobièrnu tin un obligashon pa paga no opstante e situashon di pais ta buta ku no por karga presupuesto ku oumentu di gastu di trahadónan públiko..
Gobièrnu ta kumpli ku Areglo di Estado i leinan finansiero
Artíkulo 85 di Areglo di Estado ta preskribí ku presupuesto mester ta den balansa. Demas leinan en kuantu maneho finansiero di Gobièrnu tambe ta pone e obligashon pa presupuesto keda den balansa na tur momentu. Gobièrnu no a logra na tene presupuestonan den balansa te ku añanan 2017 i 2018 a sera ku défisit. Despues ku Parlamento a aprobá presupuesto di 2019, a resultá ku entradanan di impuesto a kai di tal forma te ku a resultá ku Gobièrnu di Reino a konsiderá nesesario pa duna Gobièrnu di Kòrsou un ‘aanwijzing’ pa balansá presupuesto 2019. Ta loke Gobièrnu ta hasi tambe. Gobièrnu, pa loke ta trata atendementu ku gastunan di personal, tin e obligashon pa a lo ménos mantené esaki na e nivel aktual. Sigui subi gastunan personal sigur no ta un opshon. P’esei mester a tuma e desishon pa konhelá salarionan.
Klek aki pa e teksto kompleto di e desishon di Korte di Hustisia
