Publiká riba 06 Ougùstùs 2023
WILLEMSTAD – E Sektor di Servisio Públiko di Ministerio (Kranshi, Lokèt di Pèrmit i Reibeweis) di Maneho di Gobernashon, Planifikashon i Servisio Públiko ta notifiká pueblo en general ku djaluna, 7 di ougùstùs 2023, su servisionan lo sera mas tempran ku kustumber.
Esaki spesialmente pa e personal gubernamental tambe por bai duna un kaluroso bon biní na nos héroenan beisbolero kampeon mundial di Senior League.
Konseho di Minister a disidí ku segun ku e servisio ta pèrmití, e personal por hasi uso di e okashon ofresé. Esaki ta nifiká ku for di 1:30’or di mèrdia solamente klientenan ku tin sita trahá por akudí serka e departamentonan menshoná konforme nan sita.
Archivo Nashonal di Kòrsou si ta habrí pa tur kliente, ku òf sin sita.
Pa informashon di tur servisio di gobièrnu por tuma kontakto ku Lokèt di Pèrmit, serka e departamento di Bentana di Informashon na infovergunningenloket@gobiernu.cw òf yama nan via number di telefòn 433-3123.
