Publiká riba 02 Mei 2019
WILLEMSTAD- Minister di Desaroyo Ekonómiko, sr. Kenneth Gijsbertha huntu ku Ministerio di Desaroyo Ekonómiko (MEO), i partnernan manera Curaçao Tourist Board (CTB), Curaçao Hospitality & Tourism Assosiation (CHATA) i Curaçao Ports Autorithy (CPA) a tene un konferensia di prensa den kual huntu nan a duna un bista riba desaroyonan turístiko di Kòrsou pa ku e promé 3 lunanan di 2019.
E sektor turístiko ta un pilar ekonómiko di sumo importansia, teniendo kuenta ku su kontribushon na desaroyo ekonómiko di nos pais. Turismo ta kontribuí positivamente na kuponan di trabou, reserva di divisa i tambe nos Produkto Bruto Interno. Kada kuartal MEO, CTB, CHATA i tambe CPA ta bini huntu pa por pone sifranan di e diferente áreanan den e sektor riba un liña i konhuntamente duna un perspektiva pa turismo di Kòrsou.
Aña 2018 a kuminsá i kaba riba un nota positivo pa loke ta trata e sektor turístiko. Apesar di tur desafio e pilar turístiko a sa di kontribuí grandemente na nos ekonomia lokal i ta e intenshon pa durante aña 2019 kontinuá ku e ola di kresementu i positivismo.
Durante di e konferensia riba desaroyonan den e promé kuartal di 2019 CTB a informá ku un total di 127 mil turista di estadia a keda risibí durante e promé kuartal di 2019 kompará ku 110 mil den e mesun periodo aki na 2018. Esaki ta nifiká un subida di 15% den kantidat di turista di estadia. E 6 merkadonan prinsipal esta; Hulanda, Estádos Unídos, Canada, Alemania, Colombia i Brasil a sòru pa 81% di tur bishitante ku nos a risibí e promé kuartal di 2019. E kantidat di anochi registrá den e promé kuartal di 2019 a konosé un subida di 9% kompará ku e promé kuartal di aña 2018. Total turistanan a keda 1.1 mion anochi na Kòrsou.
Pa loke ta trata e aspekto di merkadeo internashonal di nos pais, CTB a duna splikashon di e diferente aktividatnan promoshonal ku a keda ehekutá durante e promé kuartal di 2019 usando e kampaña di branding ‘Feel It For Yourself’. Ademas a duna informashon di loke ta planiá pa e próksimo periodo.
Tambe CTB a presentá durante e rueda di prensa nan wèpsait nobo kual resientemente a keda lansá. E wèpsait nobo ta konsistí di kolónan vibrante i imágennan espektakular di nos pais tantu den forma di potrèt komo video ku sigur lo lanta kuriosidat serka tur potensial biahero pa nan bin eksperensiá nos pais. CTB pa medio di e wèpsait nobo ta ofresé e biahero un plataforma fásil ku ta yud’e krea un eksperensia memorabel tantu promé, durante komo despues di su vakashon riba nos pais. Na mes momentu e wèpsait nobo mester sirbi tambe pa brinda informashon na tantu stakeholders pafó komo esnan aki na Kòrsou. E wèpsait nobo ta na 6 idioma. Awor Franses a keda inkluí na e idiomanan ku tabatin den e wèpsait anterior esta, Ingles, Hulandes, Spañó, Portugues i Aleman.
CHATA na su turno ta raportá un oumento di 6.2% den okupashon. Alabes tantu e Average Daily Rate(ADR) komo e Revenue Per Available Room (RevPAR) a oumentá den e promé kuartal di 2019 si bo kompará esaki ku e mesun periodo aki na aña 2018. Defakto e ADR a subi ku un total di 22.4% di $151.65 pa $197.94 miéntras ku e RevPAR a oumentá ku un total di 32.0% di $126.37 pa $166.83.
Pa loke ta trata turistanan krusero ku a bishitá nos isla den e promé kuartal di 2019, CPA a indiká un kantidat di 117 barku krusero a bishita Kòrsou den e periodo aki. Esaki ta nifiká un kresementu di 7.3% mas tantu barku krusero den e promé kuartal di e aña aki kompará ku e periodo aki den 2018. Pa loke ta trata e kantidat di turista krusero, nos pais a konta ku un total di 278.105 bishitante den e promé kuartal di 2019 resultando den un oumento di 5.2% mas turista krusero kompará ku e promé 3 lunanan di 2018. E dos liñanan krusero Royal Caribbean International i Carnival Cruises tabata e dos liñanan ku mas a aporte na e kresementu aki durante e kuartal tras di lomba. Mundialmente e espektativa ta ku den e aña aki e kantidat promedio di turistanan krusero lo oumentá di 28.2 mion na 2018 pa 30 mion. Den e oumento aki Karibe ta keda e kontribuidó di mas grandi aportando na 34.4% den e sektor aki.
Pa loke ta trata e impakto makro ekonómiko di e sektor turístiko, MEO ta proyektá ku e kresementu den tur e diferente áreanan di e sektor tabata tin un impakto positivo pa Kòrsou. Den e promé kuartal di aña 2019 ta proyektá ku e sektor di turismo a generá un total di 612 mion florin pa nos ekonomia lokal. Esaki ta representá un oumento di 8.9% kompará ku e mesun periodo aki na aña 2018. Si e kresementu turístiko realisá den e 3 lunanan tras di lomba kontinuá di mesun forma durante sobra di aña 2019 MEO ta proyektá ku esaki lo kontribuí na un impakto makroekonómiko sumamente positivo na final di e aña aki.
