Publiká riba 26 Òktober 2019
Durante di e bishita sr. W. Prince a elaborá ku Minister-President sr. E. Rhuggenaath pa ku e desaroyo i historia deportivo di nos pais. Sr. W. Prince komo un íkono kende a sa di guia i train hopi atleta den e ramo di atletismo ta haña ta di sumo importansia pa e historia di deporte keda dokumentá i preservá.
Sr. W. Prince for di edat hopi hóben a praktiká atletismo i a sa di desaroyá sigui su mes den e área aki den su tempu liber. Na aña 1968 el a bira entrenadó profeshonal pa atletanan ku ta bai kompartí den olimpiada. El a siña tur tipo di téknika i tabata apliká esakinan pa su atletanan por ekselá. Asina el a guia vários di nos muchanan di un forma gratis pa nan mehorá nan prestashon deportivo. Hóbennan manera Churandy Martina, Jairo Duzant, Nathanael Esprit i Bryan Mariano ta hóbennan ku a i ta ekselá den atletismo, komo nos orguyonan nashonal i algun di nan ku renombre internashonal. Sr Prince ta sumamente orguyoso di a haña e oportunidat di trein i guia e hóbennan aki i asina kontribuí na nan formashon deportivo.
Pesei sr. Wendell Prince ta bisa ku: ‘ta ku lucha, determinashon, perserveransia, entrenamentu i konsistensia nos tur por logra ehersé kualke tarea ku nos ke hasi mihó i asta alkansá nivel profeshonal’.
Ku esaki Gobièrnu di Kòrsou ta duna rekonosementu i pone atenshon na nos mes hendenan pa nan aporte balioso na konstrukshon di nos Pais.
—
KOMUNIKASHON
** riba e potrètnan athunto por tuma nota di Minister-President sr. E. Rhuggenaath ta hasi e entrega ofishal na e kondekorado sr. Wendell Prince.