Kuadro artístiko na honor di dr. Izzy Gerstenbluth - Informashon tokante Gobièrnu di Kòrsou Bo opinion

Notisia

Kuadro artístiko na honor di dr. Izzy Gerstenbluth

Geplaatst op 07 June 2021 dor di Ministerio Enseñansa, Siensia, Kultura & Deporte

WILLEMSTAD – Gratitut i apresio ta balornan ku semper ta motivá nos hendenan pa sigui ku e bon trabou. Sra. Jean Girigori a pinta un bunita kuadro inspirá dor di e situashon di pandemia ku Kòrsou ta pasa aden i a hasi entrega di esaki na dòkter Isaac (Izzy) Gerstenbluth huntu ku Minister Steven Croes kende ta enkargá ku Kultura.

Gobièrnu di Kòrsou ta pone atenshon na nos mes hendenan ku ta traha na fabor di nos mes i tambe esnan ku ta traha arte. Pasó arte ta un parti integral di e kultura artístiko i kreativo ku ta forma parti di i ta biba den nos komunidat. Minister Steven Croes a hasi un bishita na galeria Jean Girigori i a tuma nota di tur e bunita produktonan artístiko ku ta entre otro: pintura den forma di kuadro, pintura na opheto i mas. Alabes Minister Croes a hasi entrega di e bunita kuadro titulá: “Courage, Knowledge and Experience, Saved Many Lives”.

Pa Minister Croes ta di gran balor pa partisipá den e aktividat akí komo ku duna rekonosementu na nos mes hendenan ta stimulá e hende pa sigui ku e bunita trabou. Un pabien na sra. Jean Girigori ku su bunita inspirashon ku el a kapta den un bunita kuadro na honor di dòkter Gerstenbluth. Tambe un danki na dòkter Gerstenbluth i su tim pa e bon trabou ku nan ta ehersé pa komunidat di Kòrsou. Sra. Jean Girigori tambe na su turno a yama dòkter Gerstenbluth danki pa e bon trabou i indiká ku e ta apresiá i balorá e loke ku nan ta hasi pa salba komunidat kompletu den e pandemia akí. 

 ** riba e potrètnan athunto por tuma nota kaminda Minister Croes a hasi entrega di e kuadro den presensia di sra. Jean Girigori na dòkter Isaac (Izzy) Gerstenbluth na Galeria Jean Girigori den Punda. 

Pa mas informashon por bishitá e página sosial di Ministerio di Enseñansa, Siensia, Kultura i Deporte: Facebook MOWCS.

 

Ministerio konserní