Notisia

Willemstad- resientemente Minister di Enseñansa, Siensia, Kultura & Deporte sra. Marilyn Alcalá-Wallé siguí pa Konseho di Minister a aprobá e kuadro di ordenashon (inrichting) di AGO(Arbeidsgericht Onderwijs) “Di Un Soño pa Trabou”, un tipo di enseñansa speshal dirigí riba:

1. Atkisishon di abilidatnan práktiko pa e hóben por subi merkado laboral;
2. Banda di e meta aki, e empeño ta pa yuda e hóben den su desaroyo personal i;
3. bira outo-sufisiente den komunidat.

E tres metanan prinsipal aki konosé diferente área di kompetensia (domeinen). Por ehèmpel den e meta pa e hóben ta outo-sufisiente den komunidat mester tene kuenta ku e kompetensia di: Biba independiente. E sup-kompetensianan di biba independiente ta referí na: Alimentashon, Vestuario, Limpiesa, Hasi obra di man, Kuido di animal i mata. Riba e mapa por mira e tres metanan, kompetensianan i sup-kompetensianan.

Ku e kuadro nobo aki e kampo di enseñansa ta haña instrumentonan mas fuerte i sólido pa oumentá e kalidat di AGO i e ta fungi komo é instrumento fundamental pa uniformá e diferente skolnan di AGO na Kòrsou. Te ku awor e práktika tabata mustra ku kada direktiva i skol pa AGO tabata atendé ku formashon den AGO segun nan mes struktura, sin e sinkronisashon i akoplashon nesesario den enseñansa. Ku e uniformashon di AGO por garantisá mihó kalidat den enseñansa kaminda alabes Inspekshon di Enseñansa tambe tin e medionan pa inspektá AGO di un forma mas dirigí.

Finalmente hóbennan di AGO tambe pa promé biaha den historia di enseñansa AGO aki na Kòrsou, ta konkluí ku un Sertifikado uniformé rekonosé segun artíkulo 33 di e lei di enseñansa sekundario.

**************************************************************************************************

MAS NOTISIA

Ministerio konserní: Enseñansa, Siensia, Kultura & Deporte