Publiká riba 23 Òktober 2017
Fakultat Tékniko di Universidat di Kòrsou den koperashon ku nos ministerio a organisá resientemente un kurso intensivo riba e tema di Building Information Modelling (BIM-cursus Revit).
Ta premirá ku BIM lo bin hunga un ròl sumamente importante den futuro riba mundu di konstrukshon i infrastruktura mirando ku pa medio di e programa aki lo por alkansá pinturanan tékniko mas avansá i muchu mas efektivo. E programa aki ta permití pa e trabounan di konstrukshon ku mester tuma lugá por wòrdu visualisá den ‘realtime’. E diseño lo kontené tur informashon real di e trabounan ku ta tumando lugá manera por ehèmpel datonan geométriko, gastunan real, material, midínan i markanan.
Benefisio di e BIM ta ku tur partido konserní lo por tin akseso simultáneamente na e mesun programa aki lokual lo trese kuné ku komunikashon lo kana muchu mas fásil i transparente, tempu di espera ta bira mas kòrtiku i trabounan lo kana di forma mas efisiente.
Un total di 40 (kuarenta studiante di e Fakultat Tékniko di nos Universidat a sigui e kurso aki ku éksito i a risibí nan sertifikado di BIM. Ta e intenshon ku den e lunanan benidero lo organisá mas kursonan di BIM, no solamente pa studiantenan di e Fakultat Tékniko pero tambe pa empresanan.
Nos ministerio sin duda ta sumamente orguyoso di e studiantenan aki ku e tremendo logro!
MASHA PABIEN!
