Publiká riba 08 Aprel 2022
Willemstad – Resientemente 23 persona a risibí sertifikado den kuadro di e bunita programa Biba Amor. Ta trata aki di trahadónan sosial i dosente di e skolnan: St. Jozef VSBO, Amador Nita, Nilda Pinto SBO, SGO, Albert Schweitzer College, Juan Pablo Duarte, Joseph Civilis i Maria College. Biba Amor ta un programa kaminda dosentenan i trahadónan sosial ta haña kurso pa duna lès na skol tokante tur aspekto rondó di seksualidat pa eduká i konsientisá nos hóbennan.
Na ofisina prinsipal di GMN den un esfera ameno kursistanan a risibí sertifikado for di man di Minister di GMN dr. Dorothy Pietersz- Janga i Minister di OWCS señor Sithree Van Heydoorn. Ambos minister durante nan diskurso a mustra riba e importansha di por papia tokante e tema aki ku hóbennan pa konsientisá nan pa tuma bon desishonnan relashoná ku seksualidat momentu ku esei ta nesesario. Kordinadó di e programa señora Pharetza Bertad- Damon durante su dirkurso a enfatisá ku mester inkorporá e programa den skema regular di tur skol avansá.
Biba Amor ta un “joint venture” entre Ministerio di GMN i Ministerio di Enseñansa. Programa Biba Amor no ta únikamente un sosten pa hóbennan pa tuma mihó desishon den nan bida pa loke ta trata seksualidat, pero por uza e informashon den tur situashon ku e hóben por enkontrá den su bida diario. Na 2009 señora Jeanine Constansia- Kook, direktor di Maneho di Ministerio di GMN, a skirbi e proyekto aki ku e meta pa bini ku un pakete di lès relashoná ku seksualidat spesial pa nos hóbennan.
Riba potrètnan por mira momentu ku Minister Pietersz- Janga i Minister Van Heydoorn ta hasi entrega ofisial di sertifikado na kursistanan.
Riba e último potrèt drpd: Minister di OWCS señor Sithree Van Heydoorn, direktor di sektor di salú dr. Melissa Arias, Minister di GMN dr. Dorothy Pietersz- Janga, kordinadó di programa Biba Amor señora Pharetza Bertad- Damon, direktor di maneho señora Jeanine Constansia- Kook i sekretario general di GMN drs. Sharlon Melfor.
