Publiká riba 22 Yanüari 2023
Willemstad – Ministerio di Tráfiko, Transporte i Planifikashon Urbano (VVRP) huntu ku Ofisina di Turismo di Kòrsou (CTB) a hasi entrega di 50 sertifikado na personanan ku a kaba e kurso di transporte públiko pa sea shòfùr di bùs, taksi òf ‘tourwagen’ ku éksito.
For di ougùstùs te ku desèmber 2022 tabatin 3 diferente kurso di transporte públiko:
– kurso sertifikado A,
– kurso sertifikado B, i
– kurso di rekapasitashon.
Meta di e kursonan aki ta pa duna oportunidat pa bira un shòfùr pofeshonal di transporte públiko, sea pa kore taksi, bùs, tourbus i tambe keda alsa nivel di esnan ku ya tin eksperensia komo ku shòfùr.
E kurso tabata inkluí diferente tema ku sigur ta di importansia pa e shòfùr profeshonal, manera entre otro lei di transporte públiko, maneho di presupuesto, kambio i teknologia, negosashon, turismo resiliente, bo salut, i hopi mas. E kurso a tuma lugá na Inter-Continental University of the Caribbean (ICUC) situá na Molenplein i kordiná pa Nostra Growth.
Di 58 partisipante ku a inskribí, 50 a pasa e kurso ku éksito. Tambe a saka kursistanan ku a destaká tantu durante lèsnan i tambe por medio di nan puntuashon. Esakinan tabata di kurso sertifikado A Sr. Gerardo Garrido, di kurso sertifikado B Sr. Romeo Wout, i di kurso di rekapasitashon Sr. Lawrence Francis.
VVRP huntu ku CTB, Nostra Growth i ICUC ta felisitá tur esnan ku a terminá e kurso ku éksito i spesial esnan ku a destaká. Nos ta deseá nan hopi éksito den nan karera komo shòfùrnan profeshonal di transporte pùbliko.
