Publiká riba 27 Òktober 2023
Minister Ruisandro Cijntje i MEO sumamente orguyoso
Willemstad- Djabièrnè 27 di òktober, Minister Ruisandro Cijntje huntu ku Ministerio di Desaroyo Ekonómiko (MEO), a lansa un aplikashon ku ta karga e nòmber Mi PÒTMÒNI. Esaki ta un aplikashon kaminda lo publiká preis di produktonan den e diferente supermerkado-, toko- i minimarketnan na Kòrsou. Ku lansamentu di Mi PÒTMÒNI, MEO ta brinda siudadanonan un plataforma ku por asistí nan pa hasi kompra mas konsiente i kumbiniente.
Den e promé fase di Mi PÒTMÒNI, a kuminsá ku supermerkadonan i ku tempu lo sigui desaroyá i amplia e aplikashon mas aleu. Den Mi PÒTMÒNI, un i tur lo por buska un produkto spesífiko sea via e kategoria ku e produkto akí ta kai den dje, via e tienda ku e persona ta deseá di bishitá òf dor di skirbi e nòmber di e produkto den e balki di búskeda te ariba den e aplikashon. E produkto ta sali ku un potrèt i spesifikashon di marka i grandura di e pakete ya asina ta fásil pa e usuario por tuma nota sigur ta kua produkto ta keda bendí na e preis indiká.
Den Mi PÒTMÒNI, e komparashon di preis pa e produkto en kuestion ta sali bou di e produkto den sekuensia di e establesimentu ku ta ofresé esaki mas barata te esun ku tin e produkto pa un preis un poko mas karu.
E aplikashon ta duna e usuario tambe e opshon pa traha su lista di kompras kompletu i mira fásilmente na kua establesimentu su kompras ta sali mas ekonómiko. Pa hasi esaki, ta posibel registrá un kuenta grátis den Mi PÒTMÒNI pa asina e lista di kompra por keda wardá den e persona su kuenta personal pa e no mester traha un lista kompletamente di nobo kada bia. Den Mi PÒTMÒNI, por haña tantu produktonan ku ta keda regulá den Makutu Básiko komo produktonan ku no ta regulá. E tim di Inspekshon Ekonómiko aktualmente ta sòru pa kontrolá e preisnan indiká den e aplikashon i aktualisá esakinan frekuentemente.
Mirando e impakto ekonómiko ku COVID- 19 a laga atras i e konsekuensianan ku nos pais ta eksperensiando ketubai dor di entre otro e guera entre Rusia i Ukrania, Minister Cijntje i MEO ta sumamente orguyoso ku lansamentu di Mi PÒTMÒNI. Un aplikashon manera Mi PÒTMÒNI no ta aliviá e subidanan di preis den e diferente establesimentunan, pero si e ta brinda e siudadano un grep pa disidí muchu mas konsiente na unda ta kumbiní su pòtmòni. Mas ku klaro lo tin produktonan ku ta mas karu den un establesimentu i mas barata den un otro i visevèrsa, pues pa e mundu empresarial tambe e lansamentu di Mi PÒTMÒNI ta nifiká un base di konkurensia sano entre supermerkadonan, minimarket- i tokonan na Kòrsou. Durante e fase pa desaroyá Mi PÒTMÒNI, MEO a reuní ku entre otro SUVECO kende ta e asosiashon di supermerkadonan na Kòrsou tokante e meta di e aplikashon i kon supermerkadonan mes por kontribuí pa esaki por ta un éksito.
Awor ku Mi PÒTMÒNI a keda lansá, siudadanonan ku hasi uso di e aplikashon por notifiká MEO di remarke i puntonan di mehorashon ku nan enkontrá di moda ku MEO por sigui adaptá i alsa e kalidat di Mi PÒTMÒNI. Tur remarke i puntonan di mehorashon por keda mandá via mipotmoni@meo.cw òf por manda un Whatsapp na +599 9 5621444.
Mi PÒTMÒNI ta disponibel dor di bishitá mipotmoni.meo.cw riba bo tablet, telefòn òf kòmpiuter òf usuarionan di Android por ‘download’ esaki via Google Play riba nan telefòn. E aplikashon pa usuarionan di Apple ta den desaroyo.
