Publiká riba 24 Yanüari 2021
WILLEMSTAD: Djabièrnè dia 22 di yanüari último Minister di Hustisia señor Quincy Girigorie a lansa e sistema di bishita virtual pa tur detenido ofisialmente. E sistema akí a ser introdusí na SDKK, despues ku a tuma diferente medida na prizòn a konsekuensia di Covid-19. Un di nan ta ku e detenidonan no mag di risibí bishita di nan famianan.
Promé ku a introdusí e sistema ofisialmente team di maneho di SDKK a tuma tempu pa tèst e sistema un temporada kaminda a saka tur posibel fayonan afó.
E sistema akí ta hasi posibel ku detenidonan por palabra ku nan famia dia i ora ku nan lo drenta den kontakto ku nan via Whatsapp. Maneho di prizòn a skohe pa Whatsapp dor ku ta trata di un app hopi popular rònt mundu.
Aktualmente tin mas ku 300 detenido ta hasi uso di e app akí, den futuro esaki lo sigui krese.
Gerensia di SDKK ta konsiente ku komunikashon ku famia ta sumamente importante den trayekto di resosialisashon di detenidonan.
Durante un diskurso den presensia di entre otro Sekretario General di hustisia señora Desiree Lai-Promes, direktor di sektor señora Gimena van der Gen, direktor di SDKK señor Urny Floran, miembronan di team di maneho di SDKK i representante di detenidonan, Minister di Hustisia Señor Quincy Girigorie a elaborá riba e importansia di komunikashon ku famia i restorashon di famia den e trayekto di resosialisashon.
Detenidonan ta kontentu ku e bishita virtual. Remarkabel ta ku den e kaso aki tabatin detenido ku a usa e sistema aki pa drenta den kontakto ku famianan ku nan tin hopi aña sin mira.
Gerensia di SDKK ta sumamente satisfecho ku e desaroyonan rondó di e sistema di bishita virtual i ta keda traha pa alsa kalidat di servisio pa nos klientenan.
