Notisia

WILLEMSTAD – Den kuadro di e rehabilitashon di Tula, tin un serie di aktividat ta tuma lugá riba e dianan aki. Awe mainta Sekretario di estado di Hulanda sra. Alexandra van Huffelen i Minister di Enseñansa, Siensia, Kultura i Deporte (ESKD) sr. Sithree van Heydoorn a partisipá aktivamente den un lès interaktivo duná pa kolaborador di archivo Nashonal di Hulanda sr. Zion Piggot.

E lès interaktivo aki a keda duna na e skol di Fundeshi C. J. Krijt, ku ta un skol ku ta keda manehá pa Direktiva di Skolnan Públiko. Tur informashon presentá na e alumnonan, a sali for di Archivo Nashonal Kòrsou i Archivo Nashonal Hulanda.

Na mes momento sekretario di estado sra. A. van Huffelen a hiba palabra na e alumnonan relashoná ku e tema di rehabilitashon di Tula awe dia 3 òktober 2023.

E presentashon di sr. Zion Piggot tabata hopi bon, kaminda su persona a elaborá riba e tópikonan di Djuku Kaiman, Tambú, Registro di Katibu i Kuentanan/Historia di Zakinza.
—
KOMUNIKASHON

Pa mas potrèt bishitá: Les di Historia i Archivo